Kum zawnin HSSLC pass %age sang St. Paul’s HSS-in topper hauh vek

Kum zawnin HSSLC pass %age sang
St. Paul’s HSS-in topper hauh vek
Kum hmasa leh a hmasa leh nena enin, Higher Secondary School Leaving Certificate exam-ah pass percentage a sang chho zel a, a sanna hi zaa 3 atangin zaa 6-ah a kai chho. Kumin bikah stream tina topper chu St. Paul’s HSS zirlai vek an ni a, management wise-in deficit school an che tha ber.
Mizoram Board of School Education chuan Nilaini khan HSSLC Exam 2026 result a tichhuak a. Zirlai 12243 exam hmachhawn atangin 10734 an hlawhtling a, overall pass percentage chu 87.67 niin, kum 2025 aiin 6.57% in a sang zawk. Kum 2024 khan pass percentage hi 78.04 a ni a, 2025-a a san zawkna chu 3.06% a ni. Tun tumah hian zirlai fail 1394 an awm a, compartmental chance nei 115 an awm.
Stream pathuma topper chu St. Paul’s Higher Secondary School zirlai vek an ni a. Arts-ah Lalnunhlui Sailo d/o Lalbiakliana Sailo, Melthum chuan full mark 500-ah 466 hmu in pakhatna a ni. Arts-ah hian zirlai 8714 exam an awm a, 7575 an pass a, pass percentage hi 86.93 a ni. Compartmental chance nei 93 an awm. School 64 chu an zirlai zaah za an pass a ni.
Science-ah Lalmawipuia Lawmzual s/o HL Lawnzuala College Veng Aizawl chuan hmu sang berin mark 462 a hmu a; science-ah hian zirlai 2770-in exam hmachhawnin 2472 (89.24%) an pass a, compartmental chance nei 13 an awm. School 14-ah science subject la an pass vek a ni.
Commerce-ah Vanlaltleipuia s/o K Lalhmunsangi, Salem Veng Lunglei chuan hmu sang berin mark 463 a hmu a. Commerce-ah hian zirlai exam 759 awmin 687 (90.51%) an pass a, compartmental chance nei 9 an awm. School 16-ah an zirlai zawng zawng an pass vek a ni.
Tun tumah hian an zirlaite an fail vekna sikul pakhat a awm a. Bualpui ‘Ng’ HSS niin, zirlai 7 awmte an pass zo lo vek a ni.
MBSE chairman JH Zoremthanga chuan compartmental exam nei thei 115 awmte chu admission an tlai lohna turin exam buatsaih thuai an tum tih a sawi a. HSSLC result complaint hun pawh result chhuah atanga ni 7 chhung hawn a ni tih a sawi. NEP 2020 zulzuiin subject pakhatah chauh exam that (improvement) ti duh tan a kum leh nghah ngai loin compartmental exam rualin kuminah exam nghal theih tura ruahman a ni tih a sawi bawk.
Arts, Science leh Commerce-ah hian nikum aiin pass percentage a sang zawk vek tih a sawi a. Zawhna LOTS atangin 50-60% siam a ni a, a bak 40-50% chu application leh HOTS atanga siam niin, zirna-in hma a sawnzel theihnan HOTS question telh tam deuh deuh tum a ni tih a sawi.
“Kuminah result bu-ah top 10 kan tarlang loa, hei hi CBSE leh CISCE leh Board lian deuhte kalphung a ni. NEP 2020 in kaihhruaina a siam – credit system leh grading system kalpui tura hma lak lawkna a ni bawk,” MBSE chairman hian a ti.