Kum 2021 atangin ram 77 tlawh nana Prime Minister Narendra Modi-a sem sen chu Rs. vaibelchhe 557.51 a ni a, kuminah ram 12 tlawh tawhin Rs. vaibelchhe 74.59 a hmang tawh bawk tih sorkarin a sawi.
Ningania Rajya Sabha inkhawmah kum 2025 kha prime minister zin chhuahnaa sen tam ber kum niin ram 23 a tlawhnaah Rs. vaibelchhe 187.83 a seng tih Union External Affairs State Minister Pabitra Margherita chuan Aam Aadmi Party MP Sanjay Singh leh CPI MP V Sivadasan te zawhna chhangin a sawi.
Ziaka Margherita-a’n zawhna chhannaah hian kumina zinna sensovah hian June thlaa France-a G20 Summit-a a telna a tel loh thu leh heta senso bik hi ‘chhut mek a ni’ tih a tar lang.
Kum 2021 leh 2026 chhunga prime minister a zinnaah inremna 316 ziah a ni a, heng zingah hian sorkar leh sorkar, sorkar leh institution, zir chianna kalpuitu leh university te pawh an tel a. Ram venhimna, sumdawnna, investment, nuclear energy research leh hmasawnna, damdawi thil, hman nawn theih chakna, space, infiamna leh culture te a tel.
Kumin bika Modi-a zin chhuahnaah chuan May thlaa Norway tlawha India-Nordic Summit a tel kha a senso a sang ber a, Rs. vaibelchhe 17.46 sen a ni a. February-a Israel (Rs. Vaibelchhe 11.92), June-a Seychelles (Rs. vaibelchhe 8.22) leh May-a Sweden (Rs. vaibelchhe 6.32) ten an dawt.
Kumina senso zingah hian February thlaa Malaysia tlawhnaa Rs. vaibelchhe 5.57 sen te, United Arab Emirates (UAE) tlawhnaa Rs. vaibelchhe 1.97 sen te, May thlaa Netherlands tlawha Rs. vaibelchhe 3.6 sen te, , Italy tlawha Rs. vaibelchhe 4.23 sen te, June thlaa Slovak Repiblic tlawha Rs. vaibelchhe 4.77 sen te, July thlaa Indonesia tlawha Rs. vaibelchhe 3.87 sen te, Australia tlawha Rs. vaibelchhe 1.18 sen leh New Zealand tlawha Rs. vaibelchhe 5.43 sen te pawh a tel.
“Prime minister a zin hian ram dangte nen inkungkaihna nghet siamin ram pahnih inkar, chhehvela mite nen leh khawvel huapa inthian thatna a siam thin,” tiin Margherita chuan a sawi.
Modi-a hian kum 2025 khan ram 23 a tlawh a, heng zingah hian France tlawhnaa Rs. vaibelchhe 25.59 sen chu a tam ber a. Kum 2024-ah ram 17 tlawhin Rs. vaibelchhe 109.51 sen a ni a, US tlawha Rs. vaibelchhe 15.33 sen chu a tam ber.
Kum 2023-ah ram 11 tlawh nan Rs. vaibelchhe 93.63 sen niin US tlawha Rs. vaibelchhe 22.89 sen chu a tam ber a. Kum 2021-ah ram 10 tlawhin Rs. vaibelchhe 55.83 sen a ni a, Germany (Rs. vaibelchhe 14.47) chu a tam br a. Kum 2021-ah ram pali tlawhin Rs. vaibelchhe 36.12 sengin US tlawhnaa Rs. vaibelchee 19.63 sen chu a tam ber a ni.
Margherita hian an hma chiaha Congress kaihhruai UPA sorkarah khan kum 2011 khan prime minister-in US a tlawhnaah Rs. veibelchhe 10.74 sen a nih thu leh 2021-a France tlawhnaah Rs. vaibelchhe 8.33,kum 2013-a Russia tlawhnaah Rs. vaibelchhe 9.95 leh hemi kum veka Germany a tlawhnaah Rs. vaibelchhe 6.02 sen a nih thu a tar lang bawk.
Kumina ram 12 tlawh nan PM-in Rs. vbc 74 hmang tawh
