Kumin September thleng khan Mizoramah cancer leh natna benvawn dang khirh zual damlo 2198 an awm a, an zinga 435 hi hmuh thar (damlo thar) an ni.October 13 kha dinhmun hlauhawma ding mek damlote leh an chhungten nun nuam leh hahdam zawka hun an hman theih nana inenkawlna leh hemi kawnga inzirtirna ni – World Hospice & Palliative Care Day a ni a. Health department-a Directorate of Hospital & Medical Education chuan he ni pual hian hun hmangin H&FW principal director Dr Vanlalsawma hoin hman a ni.
Palliative Care-in a tum ber chu, cancer mai ni lo, natna benvawn hrang hrang avanga damlo, dinhmun hniam leh thih hlauhawma ding mek ten rilru hahdam leh zangkhai zawka hun an hman theih nan te, an na tawrh damdawi hmanga chhawk zangkhai sak a nih theih nan bakah anmahni enkawltu an chhungte thlenga nun nuam leh hahdam zawka an awm theih nana hma lakpui a ni.
Mizoramah chuan National Programme for Palliative Care (NPPC) hmalakna in 2016 October atang khan kalpui a ni a. Serchhip leh district thar pathum tih loh Mizoram district dang zawng zawngah kalpui a ni tawh. Thawktu ten Palliative Care Unit-a awmte chauh ni loin, home visit neiin damlote an chenna inah tlawhchhuakin a tul angin damdawi leh hmanrua nen an buaipui thin a. He programme hmang tangkai tur chuan registration tih a ngai ve thung.
Palliative Care consultant Dr Lalthanmawii Khalthang sawi danin, kum 2022- 2023 chhungin palliative damlo mi 2935 en an ni a, damlo 965 admit an ni. Palliative damlo thar 964 an awm. Kumin bikah September thla thlenga palliative damlo entawh zat hi 2198 an ni a, damlo 1192 chu admit niin, damlo thar 435 an awm tawh a ni.
Mizoram State Cancer Institute Zemabawk radiation oncologist Dr Lalhlupuii chuan cancer leh natna benvawn khirh zual, dam beiseiawm tawh lo ten na hrehawm tak an tawh lohna tura Palliative Care Programme-in theihtawp a chhuah mek lai hian, damlo chhungte rilru leh taksa damna atan vantlang mipui leh NGO, volunteer bakah kohhran hruaitute leh mipuiin tih theih kan nei a, thiam taka anmahni chhawmdawl turin bengvar chhuah thar a tul, tiin a sawi.
Kuminah natna khirh bik nei 435 hmu thar
