Kumtling lo khawih chhiat tawk
te ke chheh a phelh zui kher lo
– MSCPCR
Naupang kum tling lo hursualna lama khawih chhiat tawkte chu an puitlin hnu ah an dai pelh zui kher loa, mi puitling tak tak leh tha taka zi chhuak zui ta an tam tih Mizoram State Commission for Protection of Child Rights (MSCPCR) chuan an sawi.
MSCPCR hotute hian tunhnaia naupang kumtlinglo khawihchhia a, midang hmuh theih tura hursualna video bawlhhlawh siamna atana naupang inhnamhnawih tirtu leh pholangtu Lalrampana CBI-in kumin June 9-a an rawn man thu sawiin, kan ram chhunga hursualna leh a kaihhnawih naupang chunga a thleng leh thin chu Commission chuan pawi a tiin a ngaimawh takzet tih an sawi.
“Heng dan bawhchhiatna hi kan ramah thleng tawh lo se kan duh a. Tunhnaia naupang khawih chhetu Lalrampana leh midang hetianga inhnamhawihte hian an phu tawk hremna hmu ngei se kan duh a ni,” MSCPCR chairman Jimmy Laltlanmawia chuan a ti.
Zawhna chhangin Comission hotute chuan, naupang kumtling lo khawih chhiat tawkte chu an puitlin hnu ah sual kawng an zawh zui vek kher lo tih an sawi a. Tunlaiah clinical psychologist enkawlna hnuaia awm an nih tawh thin avangin tha taka zi chhuak an tam a, a thlen phei chu social activist tha tak ni zui ta pawh an awm tih sawi a ni.
POCSO Court-ah pending case a tam lo tial tial tih an sawi a. Covid len laia pending case tam deuh thin chu tunah chuan a kal chak tawh tih an sawi. Naupang kumtling lo khawih chhiat tawkte tan victim compensation an dil sak thin a, theihtawp chhuahin chak zawka pek an nih theihnan an nawr ve reng a, tunhnaiah pawh mi pathum hnenah cheng nuai chuang hlan an ni tih an sawi bawk.
MSCPCR record neih danin, kumin May thleng khan District Court Aizawlah POCSO pending case 61 a awm mek a, District Court Lungleiah 21, District Court Champahi 6, Fast Track Court Kolasib 21, Fast Track Court Siaha 19, Fast Track Special Court (ePOCSO) Aizawl 37, Fast Track Special Court (R&P Act) Aizawl 20, Fast Track Special Court (R&P Act) Champhai 9, a vaiin 194 a awm a ni.
8 The Protection of Children from Sexual Offences (POCSO) Act 2012 Section 13, 14 & 15 chuan hursualna leh zahmawh rawngkai video leh thlalaka naupang inhnamhnawih tir leh tel tir emaw hman tangkai emaw entir leh hmuh tir emaw a thiang loa, a khap a ni.
8 Hemi piahlamah naupang laka hursualna leh zahmawh rawngkai lanna thlalak leh video reng reng, mimal kawlthat tur emaw midang hmuha pholan tur emaw pawh neih leh kawl a khap a. He dan bawhchhetu chu kum 5 aia tlem lo lung in tantir leh sum chawitir thlengin a huam a, a tisual nawntu chu kum 7 thleng tang tura hrem theih a ni.
8 IT Act 2000 Section 67 B (a) ah mi tupawh naupang hursualna leh a kaihhnawiha an lanna, naupang inhnamhnawihna emaw naupang zahmawh leh saruaka an lanna emaw electronic media hmanga thehdarh leh thehdarhtirtu; (b) naupang saruaka a awm lai thlalak/video, mipat hmeichhiatna leh hursualna kaihhnawiha an lanna thlalak /video siam, lakkhawm, internet-a zawn (browse), download, fakmawi, inthawn darh leh semkual (c) online hmanga hursualna lam hawi leh zahmawh rawngkaia naupang thlem, vau leh (d) naupang, mipat hmeichhiatna an hmang lai leh an inhritla lai, naupang pawngsual a nih lai leh naupang chunga hursualna thleng lai lanna thlalak /video siam (record) tu chu kum 5 aia tlem lo lung in tan leh Rs. 10,00,000 chawitir thlengin a huam a, a tisual nawntu chu kum 7 thleng tâng tura hrem leh Rs. 10,00,000 chawitir theih a ni.
Kumtling lo khawih chhiat tawk te ke chheh a phelh zui kher lo – MSCPCR
