Kumtling lo pawngsualtu kum 10 tang turin hrem

Hmeichhe naupang kum tling lo pawngsualtu Laldinsanga chu kum 10 chhung lung in tang turin court-in a hrem.
Champhai District Fastrack Special Court presiding officer/ judge T Saikunga chuan April 22 khan hmeichhe naupang kum tling lo pawngsual thubuaiah Laldinsanga, Zawngtetui khua hi thiam loh chantirin, kum 10 chhung lung in tang tur leh Rs. 5000 chawi turin a hrem.
Laldinsanga hian POCSO Act hnuaiah thubuai pali a awrh a, a vai hian thiam loh chantir a ni. Thubuai zinga pahnih hi POCSO Act section 10-na hnuaiah niin, kum 5 chhung lung in tang tura hrem a ni a. Section 12-na hnuaiah thubuai pakhat neiin, kum khat tang tura hrem a ni. Section 6-ah thubuai pakhat neiin, hetah hian kum 10 chhung lung in tang tur leh Rs. 5000 chawi tura hrem a ni a. Hremna hi a ruala kal tur a nih angin pawikhawiha puh Laldinsanga hi hetiang hian court chuan thutlukna a siam ta a, sumfai chawi tur hi a pe thei lo a nih chuan thla hnih dang lung ina tan belhin a tlak ang.