Mizoram rorelna in sang ber Assembly House chhungah nimin khan hmunphiah chungchang sawihonain hun rei tak a awh a, hei hian kuthnathawktute dinhmunin ngaihsak a hlawh zual ta hle tih a entir a tih theih a, a lawmawm hle.
Mizorama thlai chinga eizawngtute dinhmun hi a la derthawng em em a, eizawnna ngelnghet nei an la ni lo a, ‘bul tan’ dinhmunah hian an la ding reng mai a ni ber a. Tu te emaw, tlema lo ngelnghet deuh te chu sawi tur ting chu an awm ang; mahse, chu chu thlai chingtu kuthnathawka eizawng thin atanga chhut chuan 1% pawh an tling kher awm lo e.
Chutiang khawpa derthawng chu kan kuthnathawktute dinhmun hi a la ni a; chutih laia an thawhchhuah chhun atanga eng eng emaw ‘royalty’ lo tih chhen hi a la hun lo a. Dinhmun insawhnghehna hun atan kum 5/6 te chu royalty/chhiah laksak lova hun pek hi tihmakmawh ni zawkin a lang. Chuti ni lova, lei rem an rah hma hma a, kuthnathawktute thawhchhuah atanga royalty/chhiah lak lama lo hmanhlel chiam hi kan dinhmun hian a la keng lo hle a ni.
Hemi chungchang hi Grape wine chungchangah pawh khan sawi hlawh tak a lo ni tawh a. Grape chingtuten society dinin loan an la a, winery an din a, chuta tang chuan harsa takin grape wine an siamchhuak a. Loan rulh ngai bawk, hlep neih ve ngai bawk… hun eng emaw chen chu chhiah awl rih tura thuneitute an beisei laiin, a hnu lamah phei chuan an thawhchhuah kha ‘man sak’ a ni ta thuak thuak zawk a. Kuthnathawktute dinhmun kha a manganthlak takzet a ni.
Tun sawrkarin, kuthnathawktute chu eizawnna ngelnghet la nei lo, chhiah laksak tlak la ni lo, tia chhiah a awl ta hi, nakina an insawhngheh huna tha taka mipui sum bawma chhiah an chhun luh theihna zawk tur a nih a rinawm. Kuthnathawktute dinhmun a that phawt chuan, ram economy pawhin a that phah dawn tih hi thu dik a ni.
Kuthnathawktute dinhmun…
