LA-ah ram a kang thar, sang tel insaseng

LA-ah ram a kang thar, sang tel insaseng
An hriat theih china chhiatna thlen nasa ber ram kang an tawrh hnu lawkah Los Angeles County-ah ram kang inman kai chak tak a awm leh mek a, mi sang tel an insaseng phah leh mek.
Hughes fire an tih hi Nilaini tuk (India-a zan lam) khan Los Angeles hmarthlang lam mel 45 chuang hreta hlaah a kang tan a. Tlangrama Castaic Lake bul, mi cheng leh sikul tam tak awmna bul mai a ni.
Darkar reilo te chhungin acre 9,200 chuang kang hmanin thli thaw leh thing ro tam lutukin a pui nasa hle a. Chenna in leh sumdawnna tihchhiat erawh a la nei lo va, kang thelhtute chuan an thunun theih thuai an beisei hle bawk.
Ram kang thar hi a hmaa lian taka kang pahnih, tunah pawh a vaia la thelh mih loh, Los Angeles hmun hrang hrang tichhetute kanna hmar lama kang a ni.
Tual chhung chanchinbute chuan Hughes fire bula chengte chuan an in leh huana tui tihawin hmanhmawh takin an chhuahsan hlawm tih an tar lang.
Thlawhnain tui leh kangmei man kai theih lohna thil thlak reng a ni bawk.
Heng lai hmun hi red flag warning hnuaiah a awm leh ta a, he inralrinna hi ram kangah chuan a sang ber niin thli na tak, khaw ro lutuk leh boruak ro lutukin kang hi pui hle a ni.
Heng lai vela thli hi darkar khata km 32 leh 48 inkar vel ni thin kha a thaw chak thut a, hei hian kang tichak zualin thlawhnate tan pawh thlawh harsa khawp a ni.
Mi cheng 31,000 chuang chu inthiar chhuak tura tih an ni a, mi 23,000 chu inralring turin tih an ni bawk tih Los Angeles County Sheriff Robert Luna chuan a sawi a. Lung ina tang mi 500 dawn chu hmun dangah sawn an ni bawk.
Ni a tlak vel laiin kang hi a darh zau tawh hle a; mahse, Los Angeles County Fire Chief Anthony Marrone chuan hma an sawn zel tih a sawi.
“Kan dinhmun hi sawi lawk theih a la ni lo va, a la kang nasa a, thawktuten hma pawh kan sawn mek zel tho,” a ti.
Chief Marrone chuan thla tir lama mi 28 an thihna, in leh sumdawnna 10,000 chuang tichhetu, Palisades leh Eaton fire nen chuan tuna mi hi a inang lo hle tih a sawi.
A hmaa miah kha chuan thli a chak lo deuh va, helicopter leh thlawhna dang pawhin harsa lo takin vansang atangin a pui thei tih a sawi.
Cal Fire-a thawk, Ed Fletcher pawhin a hmaa kang nen a danglam a, thli thawt chak zawng a inang lo va, a bawrtu thelhtu pawh an tam tawh zawk tih a sawi bawk.
Fletcher chuan tuna kanna lai hi chu mihring an tlem zawk tih a sawi a, Castaic Lake panin a kang mek a, hei hi Castaic huam chhunga mi 20,000 vel chenna a ni.
“Dil hi a thleng a nih chuan thelh a awlsam deuh dawn a ni,” tiin a sawi.
Nilaini vek khan chhim lam lehzual deuh, San Diego leh Oceanside bulah ram kang hmun hnihah a chhuak bawk tih thuneituten an sawi.
An pahnih hian a la lian lo va. Oceanside bula Lilac fire chuan acre 85 kang tawhin Center fire-in acre 3.9 a kang tawh bawk a. La lian lo mah se mihring chen tamna lai a ni a. Kang thelhtuten a pahnih hian an bei mek a, inthiar chhuak tura tihna engmah la chhuah a ni lo.
Angeles National Forest thupuangtu, Dana Dierkes chuan thli leh thing ro tam lutukin tun hnaia kangmei an tawrhte chu thelh a tihahthlak hle tih a sawi.
“California-ah hian ram a kan duh hun (season) kan nei lo va, a kan kum kan nei a ni,” a ti a. “January-ah a kan chiam tum kan lo tawng tawh a; mahse, Santa Ana thliin a pui nasa a. Thli hi tun ang kum ro lutukah hian a chhan lian ber a ni,” a ti.
Tuna ram kanna laiah hian kartawpah ruah a sur dawn tih sawi lawk a ni a, hei hian kang hi a tihmih beisei a ni a; mahse, ruah hian lei tawlh, tui lian leh lei min a thlen leh hlauh mek a ni ve bawk.
Tun hnaia ram a kanna hmunah heng hi a hlauhawm zual a, ram leilung a nghet lo niin an ngai.
Governor Gavin Newsom chuan Thawhtanni khan executive order siamin kangmei a chhuah hnuah tui lian leh lei min inbuatsaihna tur a thlawna pek chhuahna tur a ni.
Thawktute chuan hmun hlauhawm zual laiah chuan sandbag hmangin hmun tam tak an hnawh.