Nikum December thla tirah Lai Autonomous District Council (LADC) an inthlang a, vawiin thlengin sorkar a la piang lo. A pian hun tur pawh hriat a ni lo.
Kum hlui December ni 3 khan LADC-ah hian vote an thlak a, December ni 9-ah vote chhiar a ni. Mahse sorkar a la piang lo a, larsap a la ngawi.
Larsap hnenah sorkar an siam theih thu thlentu pahnih an awm tawh a, larsap-in sorkar siam turin a ti chuang lo. LADC inthlana tling tharte pawhin larsap hi an nghak tawp mai nia ngaih a ni.
MDC pariat nei MNF leh MDC pasarih nei Congress te’n United Legislature Party an din a, sorkar intawm siam an tum mek. CEM atana an thlan C Lalsawmzuala’n January ni 9-ah khan larsap hnenah sorkar a siam theih thu a thlen tawh a, mahse tun thlengin sorkar siam tura tih an la ni lo.
A hmain MNF leh MDC paruk nei ZPM te’n Lairam Legislature Party dinin sorkar intawm siam an tum a, CEM atana an thlan T Zakunga’n larsap hnenah sorkar a siam theih thu a thlen chungin sorkar siam tura tih an ni lo. Ni 23 ngawt an nghak chungin larsap hnen atangin sorkar siam tura tihna thu an dawng lo.
LADC-ah hian sorkar a la piang lo a, thlan tharte pawh an la thu lo. Chairman thlang turin nomination chu an file tawh a, chu pawh chu an sut leh.
MNF leh Congress tang dunte’n larsap hnena sorkar an siam theih thu an thlen ni khan ZPM leh BJP te’n thawh ho tumin thu an lo thlung ve a, anni pawhin sorkar theih an inbeisei thu an sawi.
MNF leh Congress tang dunin CEM atana a thlan C Lalsawmzuala chuan larsap an ngaihchan thu leh sorkar hi an siam ngei an beisei thu a sawi a, “Governor hnenah sorkar kan siam theih thu kan thlen tawh a, ngaihtha takin kan ngaichang a,” tiin The Aizawl Post a hrilh.
Larsap hnen atang hian thu leh hla engmah an hre rih lo tih a sawi a, Delhi-ah a zin tih sawiin, chu chu an nghak tih te, an danah legislature party lian berin sorkarna an siam ang tih a nih avangin, ngaihthat lohna tur awma an hriat loh thu a sawi. MNF MDC-te leh Congress MDC-te an rinawm niin a sawi a, an kal peng ang tih hlauhawm an awm lo niin a sawi.
LADC-ah sorkar la piang chuang lo
