Lai Autonomous District Council chief executive member atan lakluh tak, United Legislature Party hruaitu C Lalmuanthanga chuan Zirtawpni khan LADC Session-ah CEM rintawkna a paltlang.
LADC-ah thla hnih chhung sawrkar mumal a awm theih loh hnu ah Congress member pakhat leh MNF member 12 chuan United Legislature Party an din a, an leader atan Congress member C Lalmuanthanga hi an thlang. Tunkar Thawhlehni khan larsap ruahman angin Lawngtlai district bawrhsap chuan CEM atan rinawmna thu tiamtirin a lalut a ni.
Zirtawpni khan LADC Session Hall-ah CEM rintawkna, vote of confidence neih leh niin, elected MDC 18 atangin CEM ring tawk member 12 an awm a, a kalh zawngin member 6-in ban an phar. LADC chairman VL Hmuaka chuan CEM hian rintawkna a paltlang tih House-ah a puang a ni.
CEM thar C Lalmuanthanga chuan LADC-ah mipui banphak sawrkar din a tul tih sawiin, party pahnihin an siam sawrkar ni mah se, party bil leh thunei bik an awm chuang loa, hmasawnna atana tha turah chuan mimal thuneihna kalsan a, a tam zawkin tha an tih lamah sawrkar chu a kal dawn tih a sawi a ni.
LADC CEM-in fiahna paltlang
