Lammual chhehvel hman danah
thing tihchhiat tlem dan zawng
Assam Rifles chhuahsan tak Aizawl Lammual chhehvel hman zui dan turah thing ding sa tih chhiat tlem dan tur zawn a ni a. Kih ngai a awm a nih pawhin Mizoram chhuak thing dah belh dan tur ruahman a ni.
Chief minister Lalduhoma hoin Assam Rifles ram chhuahsan hman zui dan tur reltu, pawl hrang hrang aiawh kalkhawm – Advisory Committee on AR Land chu Thawhtanni khan an thukhawm a, hma an lak mekna thlirletin hmachhawp pawimawh zual an sawiho bawk.
‘Aizawl Square’ tur duan chu a kual chhuaka footpath siam tum a ni a, a tlang a san deuh avangin rawt hniam deuh nise, thing kih ngai a awm a nih pawhin kih aia tam, thing mawi zawk, Mizoram thing ngei, mumal leh hmuh nuam zawk tura phun nise, an ti.
Tuna kawngpui zauh belh mek (Aizawl Spine Road) chu meter 14-a zauh a ni a, chu chuan metre 1.5 footpath a kengtel. Hei hi mipui lam atanga a zau tawk lo, tia sawiselna a awm avangin tun ami aia zauh belh hlek tha an ti a. A kawngko lungrem chu khawpui timawi thei tur ngaihtuah chunga kalpui tha an ti.
Mandir sawnna hmun turah Dak Inpui piah, Open Amphi Theatre sakna tura ruahman hmun thlen hma deuha hmun awl ruahman a ni a. Chhuahlama Bypass road laih mek Saron Venga a chhuah pheina tur Baptist Kohhran biak in hmun thar atan biak in awmna hnung, Modern English School ram hnung, Bypass road thar leh Aizawl Square chhuah chhawng kawngpui thar tur inkar ruahman a ni.
Bypass road thar hnuai, Bethlehem Veng chhunga forest area chu thing leh mau tichhe loa, mipui lenvah theihna tura cheimawi dan UD&PA lamin an duang a. Hnathawhna tur sum pawh a awm dawn tih sawi niin, an ruahmanna hi Committee hian a pawmsak a ni.
AR ram hmalakna hi March 17 khan Early Bird Project hawn a lo ni tawh a, hmun hrang hrangah kut thlak mek a ni a. Tun tum thutkhawmah hian UD&PA minister K Sapdanga, Revenue minister B Lalchhanzova, Tourism minister Lalnghinglova Hmar, Adviser to CM Lalmuanpuia Punte, chief secretary Khilli Ram Meena leh member dangte an tel.
Lammual chhehvel hman danah thing tihchhiat tlem dan zawng
