Lammual chhehvel ram
hman duh danah thu inhmu lo
Aizawl laili atanga Assam Rifles chhuah huna a ram hman zui dan tura Mizoram sawrkarin ruahmanna a siam leh, heng hmun humhalh duha ding Aizawl Hmathlir Pawl chu sipai chhuahsan hnua ram hman duh danah an thu a inhmu lo.
July 27 khan Aizawl Hmathlir Pawl hruaitute hian an chairman Lalbiakzama hoin chief minister Zoramthanga an hmu a. Aizawl laili atanga Assam Rifles chhuah huna concrete building ang chi din leh tih chereu lam aiin, mipui tana hmun awl zau tak, mitin tana mamawh ve tho ruahman an duh dante an thlen. Hei bakah hian heng hmuna heritage site chu humhalh zui an duh dan tih an thlen bawk.
Chief minister hian sawrkarin Laldenga Cultural Centre sak tuma ruahmanna a siam dan hrilhin, he Centre sak tur leh heritage site humhim chungchangah erawh an thu a inhmu viau lo niin Aizawl Hmathlir Pawl hruaitute chuan an sawi.
Aizawl Hmathlir Pawl hi kumin May 6 ah pawl ang taka din a ni a, hemi hma hian kum 2019 atang khan Aizawl laili atanga Assam Rifles insawn chhuah huna helai hmun hi hun lokal leh tur thlir chunga Aizawl khawpui hi mitin tana khawpui nuam a nih theih dan tur ngaihtuah chunga group anga indin chho an ni a. Hemi ang hian hma an la tan mek a ni.
BOX
Chief minister hnena an thu thlen zingah:
# Khawpui lailia puipunna awm chuan traffic jam a siam nasa a, hei hian khawpuia chengte leh khawpuia mamawh thila kal thingtlang mite hun a paih tam hle tih an sawi.
# Khawpui dang ang bawkin hmun awl zau leh thing chi hrang hrang awmna ‘Green Park’ chu helai hmunah hian siam nise, chu chu boruak tha dawn nan leh hriselna atana pawimawh a nih dan an sawi.
# Chhiatrupna liantham thleng theiah Aizawlin hmun awl lian leh ualau, pankhawm leh insenghawina tur zau tha a neih tawh loh avangin helai hmun chutiang atan chuan hauh (reserve) tam nise an duh tih an sawi.
# Aizawl khawpui traffic manganthlak khawpa a tawt tak vangin, tun aia tih zia awm deuh a nih theih nan leh
lirthei dahna hmun tur engemaw tal buatsaih erawh tha an ti a. Chumi atan chuan rawtna engemawzat an thlen nghal a ni.