Assam Rifles chhuahsan tak ram, Aizawl Lammual chhehvel hmang tangkai tura sawrkar hmalakna kalpui mek chu Inrinni khan Home minister K Sapdanga’n a a endik.
Home minister chuan, AR chhuahsan ram hman tangkai dan turah ruahmanna (master plan) fel tak siam lawk vek a ni tih a sawi a. A mitthlaa a hmuh dan aia hna an lo thawk nasa tawh chu lawmawm a tih thu sawiin, khaw chhiat laia duh anga chaka hna thei lo chu ruah a ban deuh tawh avangin October atang chuan hei aia chak zawka hna thawh theih beisei a ni tih a sawi.
Lammual hnuaia Bypass road siam mek chu thahnem tak an thawk tawh a. He hmunah hian mipui tana tangkai tur hmunhma hrang hrang a awm tih a sawi. “Thing uiawm tak tak chu a theih chin chinah zuah hram tum a ni a. Chutihrualin, mipuiin an mamawh em em kawngpui erawh siam ngei a ngai. Treasury Square leh Bazar Bungkawn inkarah lirthei riah phal a ni tawh dawn loa, mipui tana hman tur parking lian tak siam a ni ang,” a ti.
Sipai in hlui, Quarter Guard building erawh thiat loin humhalh a ni dawn tih a sawi a ni.
PWD leh PHE hotute sawi dawnin, ruahmanna kal mekah he hmunah hian Heritage Court leh Exhibition neihna tur hmun siam a ni dawn a. Building awm sa thawmthat tum niin, sak belh ngai sak a ni ang.
Lammual hnuaia Bypass road siam thar hian Post Office bulah lut tanin, Saron Veng BCM biak in bulah a chhuak dawn a. He kawng siam hna hi zaa 17 zawh a ni tawh. Kawngpui zauh hna kalpui mek pawh chhunzawm zel a ni a, zawhfel thuai beisei a ni.
Home minister hi Aizawl East-II bialtu MLA, Revenue minister B Lalchhanzova bakah Aizawl mayor H Lalremtluanga, PWD, PHE leh UD&PA hotuten an tawiawm a ni.
Lammual chhehvel sawrkar hmalakna a hmunah enfiah
