Lammuala rel kawng hawn-
naah a duh apiang tel theih
September 13-a Aizawl Lammual atanga Prime minister Narendra Modi-a’n Bairabi- Sairang rel kawng a hawn tur chu a duh apiang tan chhim theih a ni a. ID card neih kher a ngai lo.
Sawrkar thuchhuah danin, Prime minister hian rel kawng a hawn rual hian Sairang Railway Station atanga chhuak tur rel service chu Lammual atang hian a vailiam nghal dawn a. He huna tel tur hiam mipui sawm an ni a, a lawmna pui ber Lammualah hian mipui a duh apiang tel theih niin, luh man a awm loh bakah ID card pawh ken luh a ngai loa, security checking erawh tih a nih dawn bakah zing dar 8.30 ah Lammualah luh kim vek tawh tur a ni.
Zirlai naupang leh sawrkar hnathawk pawh tel tura sawm an ni a, zirlaite phur tur hian bus 14 leh sawrkar hnathawkte phur turin bus 26 ruahman a ni a. Tel tum tan engmah ken loh a fuh ber a, ken luh theih loh zingah hian intihnat theihna hmanrua chi hrang hrang bakah bag (hand bag/ backpack adt), hawl chi tiang (walking stick), flask leh ei tur fun sa pawnlam atanga ken luh phal a ni loa, vaihlo zial leh vaihlo atanga siam eng chi pawh phal a ni lo bawk.
Aizawl district magistrate chuan thupek tichhuakin, Prime minister hi Thuampui Helipad-a a tum hnuin, Thuampui atang hian Lammual panin a kal leh dawn a. Harsatna awm loa Lammual a thlen theihnan Thuampui leh Lammual inkar, via Chaltlang leh Ramhlun kawng, khawi hmunah pawh mi tumahin in sak bungrua eng chi mah an chhawp hnawk tur a ni lo, a ti. He kawng dunga petrol pump zawng zawng pawh VVIP kal lai hian inkhar vek turin a ti bawk. He thupek bawhchhia chu an bungrua man sak an nih bakah Section 223 BNS 2023 hmangin an chungah hremna lek a ni dawn tih mipui a hriattir a ni.
Lammuala rel kawng hawn- naah a duh apiang tel theih
