India ram Chhiarpui 2027 atana Mizoram puma Houselisting and Housing kalpui tur inziahluh chu Lok Bhavan Aizawlah larsap Gen. Vijay Kumar Singh (Retd) atangin bul tan a ni a. Hemi hnu hian ram chhung hmun dang rualin Mizoramah Houselisting and Housing chhiarpui hi kalpui tan a ni.
Larsap chuan chhiarpui buaipuitute chu hmaih awm lo tura theihtawp chhuah tura chahin, hriat thiam loh neite tha taka hrilhfiah a, chhiarpuia inziaklut vek thei tura tan la turin a chah. A vawi khatna atan digital census kalpui a ni chu phurawm a tih thu sawiin, a hlawhtlin ngei theihnan mipui pawh chhiarpui buaipuitute tha taka lo tawiawm turin a chah bawk.
Lok Bhavan atana enumerator ruat H Lalremruati chuan larsap-in kumin April 7-a self enumeration a lo tih tawh atanga self enumeration ID a dawn hmangin tul angte a tifel a ni.
Mizorama Houselisting and Housing bultannaah hian Directorate of Census Operations atangin Municipal commissioner cum principal census officer Joseph H. Lalramsanga, GAD addl. secretary, addl. state nodal officer Irene Zohlimpuii Chongthu leh official dangten larsap hi an tawiawm a ni.
Chhiarpui 2027 hi India rama digital census hmasa ber tur niin, thawh hniha kalpui tur a ni a. Thawh khatna Houselisting and Housing hi April 1 atang khan kalpui a ni. Thawh hnihna, population enumeration hi February 2027-ah neih tan tur a ni ang. Thawh khatna hnuaiah hian April 1-15 chhung khan mahni inziahluh self enumeration neih a lo ni tawh a, April 16 atanga May 15 thleng hian Houselisting and Housing kalpui a ni ang.
Larsap atangin Houselisting
