Last 16 lut Djokovic
Shanghai Masters khelh mekah Novak Djokovic chuan thawhlehni khan awlsam takin hnehna a chang a, last 16 a lut. Djokovic hian title 100 lak tlin tumin hma lam a pan mek a. A tum tipuitling turin vawi li chak chiah a mamawh tawh.
First round-ah fiahna hautak paltlang Djokovic hian second round-ah amah ngaisang em emtu Flavio Cobolli a hmachhawn a, Italian lakah hian awlsam takin hnehna a chang. Kum 37 mi Djokovic hian set khatnaah break a nei zawn nghal a, game khat chiah hloh chungin set a la.
Awlsam taka set khatna a lak hnuin set hnihnaah a khel tha chhunzawm viau a, break nei zawn lehin game hnih bak a hloh duh lo. A khingpui Italian rawlthar Flavio Cobolli lakah hian 6-1, 6-2 in hnehna a chang a, last 16 a lut. Last 16-ah Russian player Roman Safiullin a hmachhawn zui leh ang.
Tennis player zingah title 100 la tling thei pahnih chiah an awm a, chungte chu Jimmy Connors (109) leh Roger Federer (103) te an ni. Shanghai Masters-ah hian a champion thei a nih chuan Djokovic hi title 100 la tling thei pathumna a ni dawn a. Inelna hrang hrang a la hmachhawn zui dawn bawk vangin record ropui siam theihna hun tha a la nei.
Serb hi Grand Slam-ah vawi 24 zet a champion tawh a, ATP Finals-ah champion ngun ber a ni mek a. ATP No. 1 ni rei ber a nih bakah ATP 1000 Masters inelna hrang hranga champion vek thei awmchhun a ni mek bawk. Mimal inelna hrangah hnuhma ropui tak a hnutchhiah hnuin Olympic Gold Medal a la leh nawlh bawk a. Serbia chu inelna lianah a lo champion pui tawh bawk. A hnuhma hnutchhiah tawh hrang hrang vang ngawt pawhin Djokovic hi Tennis GOAT a ngaih a ni sa tawh a. Tittle la hnem ber record a siam leh thei hlauh a nih chuan GOAT a nihna nemnghet in, a chungchuanzia a nemnghet ngei ang.