Lawng atangin hantavirus kai pahnih leh rinhlelh la chhuak

Lawng atangin hantavirus kai pahnih leh rinhlelh la chhuak
UN health agency chuan cruise ship atangin hantavirus vei mi pahnih leh a kai nia rinhlelh pakhat chu an la chhuak a, Netherlands an panpui tiha sawi a. Hri len mekna lawng hi Cape Verde atangin mi 150 vel phurin Spain-a Canary Islands a pan leh.
Associated Press-in video a tihchhuahah chuan health worker-ten invenna (protective gear) nen lawnga chhuak mi pathum hi an la chhuak a, an zingah hian British doctor pawh a tel a, Spanish health ministry chuan ‘a na hle’ tih a sawi rualin hma a sawn tih a sawi a. Air ambulance-a phur chhuak hlawmin Nilaini zan khan Amsterdam-ah an tum.
Dutch foreign ministry chuan mi pathum lak chhuahte hi kum 41 mi Dutch, kum 56 mi British leh kum 65 mi German an nih thu leh Europe-a damdawi in tha bika dah tur an nih thu a sawi a. WHO chuan Nilaini khan Senegal-a endikah hmun hima insawn chhuak zinga pahnih chu hantavirus kai an ni tih finfiah an nih thu a sawi.
Damdawi thuneitute chuan lawnga chuangte leh thawktute zingah he natna kai anga awm an la awm loh thu sawiin cabin-ah an inkhung hrang vek tih an sawi a. Canary Islands pana an zin lehna hi ni thum, ni li vel a la ni dawn a, Spanish health ministry chuan an thlen hian ‘mipui tan hlauhawm a thlen dawn lo’ tih an sawi lawk.
Lawngah hian mi pathum an thi tawh a, ruang pakhat a la phur niin World Health Organization (WHO) chuan a sawi a. A vei mi pariat zinga mi panga chu laboratory-a endikna atanga finfiah tawh an ni bawk.
Hantavirus hi bawlhhlawh hip luh atanga kai a ni tlangpui a, mihringah inkaichhawn theih mah se a tlem hle niin WHO chuan a sawi a, hri lenga thiam bikte chuan vantlang tan a hlauhawmna a tam lo niin an sawi.
Europe leh Africa-a damdawi thiamte chuan April 1-a South America atanga Antarctica leh Atlantic thliarkar hla tak tak eng emaw zata chawl tur lawng chhuaka hri kaite hi tute nen nge an lo inhnimhnaih tawh tih hriatchhuah tumin hma an la mek.
Hri leng lo chhuahna chhuitu Argentina thuneitu pahnih chuan sorkarin a ngaihdan lian ber chu Dutch nupa tuak khatin an chuan hma, Ushuaia khawpuiah sava an ennaah an kai tih an sawi.
An nupa hian zin chhungin bawlhhlawh paihna hmun an tlawh a, hetah hian an kai ta a nih pawh a rinawm thu an sawi. Thuneitute hian chanchinbute hnena thil sawi chhuah phalna an neih loh avangin an hming tar lan an duh lo va, chhui chian mek zel a la ni tih an sawi a. Thuneitute chuan a hmain Ushuaia leh a chhehvel, Tierra del Fuego province-ah hantavirus kai an la awm ngai lo niin an sawi ve bawk.