Mizorama puan tah leh Mizo puan atanga thuam hrang hrang phochhuahna, ZOHANDCO leh sawrkar laipui Ministry of Textiles hnuaia Development Commissioner (Handlooms) tangdun buatsaih ‘State Handloom Expo’ chu Thawhlehni atang khan Lawngtlaiah neih tan a ni a.
Expo hawngtu Lawngtlai addl. DC Abraham Beirazi Khithie chuan handloom hmang a eizawnna kalpui kawngah hmasawnna nasa tak hmuh tur a awm chu lawmawm rualin, a tih ralna lamah a leitu turte mil zawnga puan leh thuam hrang hrang siamchhuah pawh herrem thiam a pawimawh tih a sawi a ni.
ZOHANDCO chairman C Lalrammawia chuan Lawngtlai district-ah Handloom Expo tum thum buatsaihna a ni, tiin, Mizoram hmun hrang hranga puantahtute kutchhuak inzirtawnna huna hman thin a ni tih a sawi. Mahni ram kutchhuak thil hrang hrang phochhuahna leh chawisanna hun pawimawh tak a nih thu a sawi bawk a ni.
October 29 thleng awh tur Handloom Expo-ah hian stall 34 awmin heng zingah hian la hlum leh puan tah dan entirna, Theme Pavillion a awm a ni.
Lawngtlaiah handloom expo
