Cholesterol sang hi hriselna atana thil pawi tak a ni a, lung lam natna risk a tisang a, stroke leh heart attack neih theihna risk a tisang thei bawk. Damdawi ei tih loh a cholesterol tihhniam theih dan kawng tha pakhat chu ei leh in a inven hi a ni a, cholesterol tisang duh chi te ei loh/ eitlem a, cholesterol tihniam thei chawtha ei tam tur a ni.
Thlai (vegetables)-a siamtu’n compound chi hrang hrang a lo dahsa te hian fiber leh antioxidant an pai a, chu chu cholesterol tha lo (LDL) tihhniam nana tha an ni. Tun tumah hian cholesterol tha lo (LDL) tihhniam nana chawtha ni a Times of India-in a tarlan te kan rawn chhuah chhawng a, heng thlai te hi nitin kan ei ziah theih chuan cholesterol kan control tha thei dawn niin an tarlang.
1. Broccoli: Broccoli-ah hian vitamin, mineral leh dietary fiber a tam hle a ni. Dietary fiber hian thisenzama cholesterol a thlen hmain a lo man khawm a, a antioxidant lutein leh vitamin C pai te chu thisenzam chhe tur veng theitu a ni bawk. Zirchianna atanga an hmuh danin regular taka broccoli ei hian cholesterol test result-ah a tha zawngin nghawng a nei ngei a, lung lam natna risk tihniam thei a ni. Broccoli chu hmin lutuk a chhum aiin hminphawk deuh a steam emaw, hel ei emaw a tha ber.
2. Bawrhsaiabe: Bawrhsaiabe-ah hian soluble fiber a tam hle a, chu chu gel ang deuh a bawrhsaiabe tihnâng deuhtu pawh hi a ni a, digestive system tan chawtha tak a ni. Bawrhsaiabe a hnâng deuh awm hi thisenzama cholesterol a thlen hmaa lo mankhawmtu tha tak a ni. Antioxidant leh plant compound a pai te thawkho chu thisenzam chhe tur vengtu tha tak a ni bawk. Zirchianna an neih atanga an hmuh danin nitin bawrhsaiabe ei thin te chu an LDL cholesterol leh total cholesterol tihhniam nan a tangkai hle.
3. Bawkbawn: Bawkbawnah hian soluble fiber a tam hle a, a calorie paia tlem bawk a, chutihrualin vitamin leh mineral, lung hriselna atana tha tak tak a pai tho si a ni. Zirchianna an neihah chawhmeh atana bawkbawn regular taka hman hian LDL cholesterol a tihniam thei a, lipid profile result a titha thei bawk.
4. Carrot: Carrot chu mit tana chawtha a ni tih chu kan hre lar viau a, cholesterol level siamthat nana chawtha a ni tih erawh kan hre lar vak lo ang. Carrot-ah hian soluble pectin fiber a awm a, chu chu thisenzama cholesterol lut tur vengtu tha tak a ni. Antioxidant beta-carotene a pai leh compound dang te nen carrot hi thisenzam vengtu tha tak a ni. Carrot chu hel eiin a thatna kan dawng tam thei ber. Zirchianna an neih atanga an hmuh danin carrot ei thang te chuan cholesterol test result tha zawk an nei tlangpui a ni.
5. Spinach: Spinach-ah hian lung vengtu atana tha nutrient leh fiber a tam a, cholesterol tihhniam nana chawtha tak a ni. Spinach-ah hian carotenoid lutein a awm a, chu chu LDL cholesterol oxidising tur vengtu a nih avangin artery blockage vengtu tha tak a ni. Magnesium leh potassium a pai tam bawk a, chu chu blood pressure siamthatu a ni bawk.
LDL Cholesterol tihhniam nana chawtha
