Leeds in quarter-final an lut

Pathianni zan khan FA Cup quarter-final khelh zawh a ni a, Leeds United chuan West Ham United paltlangin semi-final an lut. Hun pangngaiah tlawm pumpelh hram mah se mualneitu West Ham in penalty shootout ah tlawm an pumpeh zo lova, an mualah ngei uiawm takin an tlawm.
London Stadium-ah West Ham United hmachhawn tura lenglut Leeds United in an khel tha viau a, goal thun hmasa zawkah an tang. Leeds hian an mualah chak ngei tuma tan khawh West Ham tlarhnung an paltlang a, minute 26-naah Ao Tanaka chuan hmahruaina goal a thun. Mikhual an nihna hmunah goal thun hmasa zawk an nih vangin Leeds an phur viau a, inrintawkna sang zawk nen mikhual an nihna hmunah an inlan.
Goal an chhuah hnuin Hammers in an si phurh sut ngei tumin tan an khawh nasa hle a, hlauhawm siamin, goal thun theihna hun tha nei bawk mah se an chhawr tangkai zo lova, si khat phur chungin chawlhlawk an hmang.
Chawlhlawk hnu lamah inkhel a hmuhnawm leh zual a, goal thum ngawt hmuh tur a awm ta nghe nghe. An si phurh sut tuma tan khawh West Ham an chesual nawn leh a, penalty an chawi. He penalty hi Dominic Calvert-Lewin- 26’Dominic Calvert-Lewin chuan minute 75-naah a pet goal a, an goal hnihna thunin, an hmahruaina a tizau a, chak turin an dinhmun a tha tawk viau tawh.
Si hnih phur a, dinhmun chhe taka ding tawh West Ham in an si phurh sut tumin thapui tak zet zet an thawh a, an mikhualte an nawr tawm a, hlauhawm an siam deuh reng. Ball chang tamin, an khingpuite nawr viau thin mah se a tawp an khar tha thei mai lova, a pawimawh ber goal an thun thei lo reng. Hun pangngaiah goal an thun theih loh vangin tlawm ngei tura ngaih an ni tawh.
An dinhmun chhe viau tawh mah se Hammers in an thla an thlah duh lova, an beidawng mai mai duh hek lo. Goal thun tumin tan an khawh zui zel a, inkhel tihmuhnawm leh zual turin hun pek belhah goal hnih ngawt an thun ta nge nge. Hammers tan hian Mateus Fernandes chuan minute 90’+3-ah goal thunin an si phurh a sut then. He goal hian mualneitu lam a fuih phur thar hluai a, inkhel entu mipui authawm a tha zui viau bawk.
‘Bei nge sei run dung’ tia goal thun tuma West Ham in tan an khawh sauh sauh laiinmikhual team Leeds United in an goal venhim tumin thapui an chhuah ve thung a. An khelh dan inang lo tak chu inkhel tihmuhawm zualtu a ni ta tlat thung. Gaol thun tuma tan khawh Hammers hian an goal khtna an thun atanga minute thum hnu lekah Axel Disasi chuan goal thun zui leh zatin an si phurh a sut zo ta nge nge. An si phurh an sut zo va, 2-2 a nih tak vangin Hammers hian an mualah chak a, quarter-final luh beiseina an nei sang hman hle nghe nghe.
Hun pangngaiah goal lut a awm belh theih loh vangin penalty shoot-out hmangin chak tur zawk zawn a ngai. West Ham leh Leeds tana pettu hmasa Jarrod Bowen leh Joël Piroe ten an thelh ve ve Hemi hnu hian Leeds tana pettu pathumin an pet goal vek laiin West Ham tana pettu palina Pablo in a thelh tlat thung. Chak theihna remchang an neih laiin Leeds United tan Pascal Struijk a rawn penchhuak a. Harsatna tawk lova pet goal in chakna goal a thun a. West Ham United laka 4-2 a hnehna changin quarter-final an lut ta a ni.