Lei chhungril thûk tak, feet 3,000 chuanga thukah marathon an tlan a, marathon tlanna thuk berah Guinness World Records-in a puang.
He marathon hi Garpenberg, Sweden-ah neih a ni a, ram hrang hrang 18 atangin mi 55 an tel a, an tlanna hi lei chhung ril thuk tak, feet 3,669 leh inches 10 a thuk a ni. A chhung a thim em avangin heasdlamp an vuah vek a ngai a, lap 11 tlanin, he marathon-ah hian charity atan dollar maktaduai khat vel an tuak ngah thei nghe nghe a ni.
He marathon a tlan zinga pakhat chuan, “Lum tak a ni, a hnawng bawk si, a khu deuh bawk. Mahse, kan tha e,” a ti.
He event hi BecomingX, ICMM leh Boliden te thawkhoin an buatsaih a ni a, a hmaa hetiang record chu Crystal Mine Underground Marathon, Germany-a an siam niin, an marathon tlanna hi lei chhung, sea level aia feet 1640 leh inches 5 a hniam a ni ve thung.
Lei chhungril a marathon tlanin record an siam
