Indonesian thuneitute chuan West Java province-ah lei min nasa tak avanga mi 10 an thih hnuah chin hriat lova awm mi 80-te zawn hna an thawk chhunzawm mek zel.
Lei hi inrinni zing khaw var hmaa thleng niin a hma ni atang khan ruah tam tak a sur tih weather agency chuan an sawi a, ruah hi chawlhkar khat chhung an province leh hmun dangah pawh a la sur chhunzawm dawn niin an sawi lawk.
Mi cheng pakhat kum 36 mi, Dedi Kurniawan-a chuan tlangram khua, Indonesia khawpui, Jakarta atanga chhimchhak km 100 chuanga hla, Pasir Langu-a lei a min nasat ber tum nia a hriat thu a sawi.
“A chang chuan kan bul lui lian avanga tui lian tenau hi chu kan lo hre tawh thin a, tun tumah erawh ram ngaw atangin lei a lo tawlh a ni,” tiin Reuters a hrilh.
Ruah a sur chhunzawm zel avang leh a hmunhma a chhengchhiat em avangin chhanchhuah hna thawktute chuan Inrinni khan khawl lian tak tak inchhawp mah se hna an thawk hleithei lo niin thuneituten an sawi tih Kompas TV-in a tar lang.
Jakarta telin West Java-a hmun thenkhatah tui a lian bawk tih sawi a ni a. Tui chim chin sang avang hian mi tam tak chu hmun sang zawkah thiar chhuah ngaiin an awm a ni.
Indonesia-ah hian thla hnih liam taah khan Sumatra thliarkarah cyclone avanga tui lian leh lei min nasa takah mi 1,200 vel an lo thi tawh a, chenna in sang tel chhiain mi maktaduai khat chuang awmna tur nei lovin an awm phah tawh a ni.
Lei min vanga mi 10 thih hnuah chin hriat loh 80-te zawng zui
