Leiba ‘rulh-sak’

Mizoram Legislative Assembly Session kal mek nimina zawhna leh chhanna hunah leiba ‘rulh-sak’ chungchangin khel a hlawh hle.
Zawhna, starred question 63-na neitu Pu Robert Romawia Royte a awm loh avangin a aiawha zawhna zawt tura a ruat Pu Lalchhandama Ralte, Leader of Opposition chuan zawhna a zawt a. Zawhna hi chief minister-in ‘sawrkar lo awm leh tur leiba hnutchhiah kan tum ve lo’ tia a sawi chungchang a ni a, ‘he sawrkar hian sum puk a uar hle chung hian leiba nei lovin engtin nge insiam a tum?’ tih chu zawhna a ni.
Finance changtu Pu Lalduhoma, chief minister chuan, ‘sawrkarin leiba hnutchhiah a tum lo tih hi, sum puk leiba (borrowing) rulh bang outstanding debt sawina a ni lo a, kan hnung amite rulh tura thil lo lei bat emaw, sum awm si lova hna lo inthawhtir ve ringawt emaw avanga ba siam chawp (commuted liabilities) sawina a ni a. Commutted liabilities siamtu tam tak chu budget provision awm si lova supply order issue te, work order pek te a ni ber a, hengte hi tun sawrkar chuan pumpelh a tum a ni’ tiin a chhang a.
Pu Lalchhandama Ralte chuan, “Leiba an rulh reng rengin ‘MNF leiba’ han tih deuh kher kher te, ‘electric man an bat’ tih te, ‘health care an bat’ han tih hi, responsible government, mawh la ngam lo sawrkar an ni em? Sawrkar hmasa an dem zel hi democracy kalphung a ni em?” tiin zawh belhna a siam a.
Pu Lalduhoma chuan hei hi chhangin, “Sawrkar hmasa bat a ni a, kan rul a ni; chu chu dawt a ni lo, sawi loh theih loh a ni,” a ti a. Pu Lalchhandama chuan, “Responsible government mawh an lak tawh chuan sawrkarin leiba a rul ti ve mai sela, MNF sawrkar paw’n kan hmaa sawrkar leiba tam tak kan chhawm a, Congress leiba kan ti ngai lo, hei hi a kalphung lo… Mipuite hriat turah fel bik, tha bik, danglam bik nih tuma hma amite hek rana sawi fo hi kalphung thar tha lo tak a ni,” a ti a.
Chief minister chuan, “Mawh kan phurh avangin kan hma amite kih hnawk kha kan thian chho zel a ni, an mawh zawng zawng nen kan phur a ni,” tiin a lo chhang leh a.
A kar lakah chief minister hian ‘leiba rulh-sak’ tih tawngkam a hmang chu Pu C Ngunlianchunga lo inrawlhin, ‘rulh-sak tih aiah ‘sawrkarin a rul’ tih chu tawngkam mawi zawk nia a hriat thu a lo sawi ve bawk.
Nimina starred question 63-na hi, zawhna neitu tel lova zawhna chai rei ber a ni hial maithei. Zawhna neitu awm lova zawh belhna siam, chumi chhanna avanga hun hman hi minute 16 vel a ni a. Leiba rulh chungchang hi minute 8 zet chai a ni zui bawk.
Eng pawh ni se, sawrkarna fawng chelhtu hi political party ni mah se, democracy-ah chuan ‘mipui sawrkar’ a ni tawh a, party bil sawrkar a ni lo; chutiang bawkin sawrkar kal tawh pawh party sawrkar ni lovin mipui sawrkar tho a ni.