Fur ruahtui tla a tam tak deuh avangin Mizoram hmun hrang hrangah nunphung a tibuai nasa a, nunna chan phah la awm lo mah se, leimin leh tuilian vangin hmun him lama inthiarchhuak, khualzin tangkhang leh thlai chin tihchhiat a awm nual tawh.
Aizawlah ruahsur nasa avangin leiminin inkalpawhna kawng thenkhat a ti ping nual a, a tam zawk chu kaltlang theiha siam lehngal niin, chhiatna liantham dang thleng a awm thu hriat a ni rih lo.
Kulikawn Ngaizela lung tla chu tun dinhmunah Aizawla nunphung tibuai bertu a ni a. Nilainia lung tla avangin helai kawng hi a him lo zui a, Ningani khan tum hnih lung a tlak leh avangin lirthei paruk vel a tihchhiat bakah mi panga in hliam tenau an tuar. He kawng hi lirthei tan tlan a him loh avangin khar a ni tawh a, kea kal tan pawh fimkhur hle turin inhrilh a ni.
Ningani atang khan lung tla hi thenfai tum ni mah se, lung a la tlak belh reng avangin thulh a ni a; Ngaizel kham awm dan hi drone hmanga enfiahna atangin lung hi tla leh mai thei a la awm a, thenfai ngam a ni rih loa ngaih a ni. Khaw awmdan en chungin vawiin (Zirtawpni) lamah thenfai tum a ni ang.
Lunglei atanga Lawngtlai panna kawngpui Bualte daia leimin pawh thenfai ni thin mah se, a tlak belh zel avangin ni hnih chhung vel chu lirthei eng chi mah kaltlang theih lohin a awm tawh a, mi 500 vel an tangkhang mek nia sawi a ni.
Lunglei lam atanga lirthei tangkang engemawzat chu Lunglei lamah an let leh a, kawng tlang hun nghak lo thei lo lirthei 200 vel erawh a chambang. Nilaini zan khan Bualte in lirthei tangkhanga chuang mi 400 vel leh Tualthu-in mi 70 vel mikhual an nei a, Siaha – Lawngtlai lam atanga kal mi engemawzat chu Tawipui South-in an mikhual bawk. Tangkhangte tan hian khawtlangin chaw ei tur an siamsak. Mahni lirtheia riak leh hall-a riak bak mimal inah riahna tur an sem a, chhungkaw khatin mi 10 chuang thleng pawh an awm tih thu dawn a ni.
Bualte dai leimin hi Ningani zing lam thleng khan ala tlak reng avangin thenfai hleihtheih ala ni loa, Lunglei district thuneitute chuan, lei leh lung tla hi thenfai a la nih loh avangin, Bualte khawtlang tana phurrit belhchhan a nih lohna turin Hrangchalkawnah lirthei kaltlang theih loh turin an dang rih a ni.
Tunhnaia chawl loa ruahsur avang khan Mat Lui a lian nasa a, hei hian Serchhip a thlai chinna hmunpui ber, Serchhip Zawlpui Phaia kuthnathawktu, nul siamtute thlai – zikhlum, bawkbawn, hmarchapui leh a dangte thar leh seng lai mek a chim chhe nasa tih thu dawn a ni.
Mat lui lian hian a luan thinna kuang pangngai pelin, Zawlpui phai zau hrang hrangah a luang darh nasa a, hei hian Serchhip Zawlpui phai zau hrang hranga thlai leh a rah hmun hrutin a chimchhia a ni. Ruah hi a sur zel a nih chuan Zau hrang hrang inkalpawhna thir lei pawh a chim phak rin a ni.
Hetihrual hian, Zawlpui phaia loneitu hi fur tuilian thin laka himna turin an theih ang angin an lo inhmakhua ve thin avangin Mat Lui lian hian chhiatna nasa zawk a thlen chho zel lo tura beisei a ni.
Khawthlangtuipui lian chuan ziaawm lam ala pan thei loa, tuilian leh leimin vangin Tlabungah chhungkaw 34 vel leh Tipperighat-ah chhungkaw 35 vel an awm tawh a, hmun hniam lama awm tho inbiakpawhna that loh avanga an dinhmun hriat theih rih loh khua an awm nual bawk.
Tlabung Chawnpui Venga chhungkaw 3 chu leimin vangin Ningani khan an inthiarchhuak a, Tlabung Chawnpui Venga chhunkaw 12 leh Chanmari Venga chhungkaw 2, an vaiin chhungkaw 14 chu an inthiarchhuak tawh a ni
Leimin leh tuilian vangin mipui buai Mat lianin Zawlpui Zau thlai tichhia
