Indian Air Force hnena ram hralh danah ZPM sawrkarin dan lam an ngaihtuah tawh loa, sum ei ringawt an ngaihtuah tih MNF hruaitu Zoramthanga chuan a sawi.
Thawhtannia an party programme hmanah MNF president Zoramthanga chuan, Indian Air Force hnena Lengpui ram hralh to lutuk chu a mak em em tih sawiin, IAF hian Congress leh MNF hunah khan ram lei tur an zawng a. A thuphungin tha an tihpui a, an tih tak takna erawh 2025 May 15 khan preliminary notification a chhuak ta tih a sawi.
“An ram lei tur ZPM sawrkarin a zawng a, bul an tan ta tak tak a ni. Danin social impact assestment neih ngei ngei tur a tih kha nei loin Revenue minister khan a tul lo e, tiin a cancel hmak a. Parliament dan siam, minister pakhatin a tul lo, lo tih ve ngawt tur a ni lo,” a ti.
Final notification chhuah a nih hmanin cheng vaibelchhe 188 chuang Aizawl DC account-ah an lo chhung hman vek tawh, tiin, “Hei hi a dik lo lutuk. Sum dah vek tawh hnuah final notification a chhuak a, an kal khalh tir. An sum dawn tur an hmanhmawh lutuk a, a zia lo ngawt mai. Court-ah engtin tak sawi ang mawle,” a ti.
He ram lei danah hian dan bawhchhiatna a nasa niin chief minister hlui Zoramthanga hian a sawi a. Dan lam ngaihtuah tawh loin sum ei ringawt an ngaihtuah a. CBI-in an chhui chuan an buai dawn hle tih a sawi a ni.
Lengpui ram hralh danah sum ei ngawt an ngaihtuah – Zoramthanga
