Lengpui ram lei danah
CBI chhuitir ngam lo
– MNF Legal Board
Lengpuia Indian Air Force-in ram a leinaa dan bawhchhiatna awm nia ngaih avanga CBI chhuitir tura an ngennaah, ZPM sawrkar chuan chhui phalna pe mah se, a bawhzui tak tak lo tih chiang tawh niin MNF Legal Board chuan an sawi.
MNF Legal Board vice chairman Lalpianfela Chawngthu chuan, kumin February 5 khan Mizoram sawrkar chief vigilance officer (CVO) hnenah Lengpui ram IAF hnena hralh chungchang CBI chhuitir tura ngenna an thehlut a. Hemi bawhzui hian ZPM sawrkar chuan February 23 khan CBI hnenah chhui phalna an pek thu notification a tichhuak a. Notification-ah hian CBI director chu ‘copy to Sl. No. 6’ ah dah a ni ve tih a sawi.
March 6 khan Mizoram Legislative Assembly-in IAF-in Lengpui ram an lei danah dan bawhchhiatna leh corruption a awm nia lang chu Mizoram mipui duh dan leh beisei angin CBI-in a chhui thuai theihnan sawrkarin rang taka bawhzuiin hma la rawh se, tiin private resolution lut chu an pawm bawk tih a sawi a ni.
“Kan complaint thehluh hi kan bawhzui zel a, March 25 khan eng chen nge sawrkarin a kalpui tawh tih zawtfiah turin CVO (chief secretary) hmuh kan tum a, Vigilance department lama kal tura thurawn min lo pek angin Vigilance secretary kan hmu a. Complainant kan nih anga notification an chhuah copy pawh pek kan nih ve loh thu leh a copy min pe ve turin kan dil. Kan complaint copy hi CBI lamah thawn thlak a nih leh nih loh kan zawt a, an thawn thla a nih chuan an thawn thlakna lehkha kan dil nghal bawk. Vigilance secretary office hian an thawn thlak ngei thu leh chu’ng lehkha copy chu a tuk March 26-ah an pek tur thu sawi mah se, vawiin thlengin kan dawng ta lo,” a ti.
Hemi hnu lama an thil hriat zui chu, RTI hmanga zawhna – “Lengpui ram IAF hnena hralh leh lei dan chungchangah CBI chhuitir tumna a awm em? A awm anih chuan CBI hnena lehkha thehluh copy min pe thei angem?” tih chhannaah, CBI chhuitir tumna a awm thu leh CBI hnena an lehkha thehluh chu February 23-a consent an pekna notification chauh chu an lehkha pek tur neih a ni tih Lalpianfela Chawngthu hian a sawi.
“ZPM sawrkar hian CBI chhuitir tumna tak tak an nei loa, an ngam bawk lo. Consent an pekna notification ringawt hi CBI chhuitir tura thu tling a ni phak loa, MNF-in CVO hnena complaint kan thehluh hi CBI director hnenah an thawn bakah chhuitir tura ngenna, forwarding mumal an siam tur a ni. MNF chuan Mizoram Legislative Assembly-in resolution a lo pass tawh ang ngeia CBI-in an chhui ngei theihnan hma kan la zel dawn a ni,” a ti.
MNF Legal Board hruaitu hian, Sairang Kolabari rama sipai ram lak turah ZPM mi leh sate sum leh paia hlawkna umin an hmanhlel leh mek niin a sawi bawk a. RTI hmangin Aizawl DC office-ah dil a, Section 8 (1) (a) a security leh strategic interest khawih a nih chhuanlamin pek an ni lo thung tia sawiin, RTI chhannaah hian pek tumna a awm lo tih ni loa, pek chhuah theih a nih loh thua an chhan avang hian, a awm ngei a ni tih a chiang tih a sawi. “Chief minister Pu Lalduhoma, Lok Sabha MP Pu Richard Vanlalhmangaiha leh ZPM hruaitu thenkhat an inhnamhnawih dan hi sawifiah turin leh heng lehkha pathum hi mipuiah tlangzarh ngam turin kan phut a ni,” a ti.
Lengpui ram lei danah CBI chhuitir ngam lo – MNF Legal Board
