Lersia Play atangin Vbch 4.78 lalut tawh
Mizo film chi hrang hrang awlsam taka kan en theihna Lersia Play hi mizo OTT platform hmasa ber niin, Leitlang Pictures Production leh Lailen Consulting Pvt Ltd tangkawp ten an siam a ni a. Tun dinhmunah film chi hrang hrang 60 chuang awm tawh in, heng atang hian cheng vaibelchhe 4.78 an lalut tawh a ni.
The Aizawl Post zawhna chhangin Gospel Ramdinmawia, CEO, Lersia Play chuan Lersia Play-a film an dah luh zingah Pa Hausa (directed by Drew Pachuau) chu en tu tam ber a nih thu sawiin, he film atang hian cheng nuai 56 an laluh tawh thu a sawi a. Nukawki Pasal film chu pawisa lakluh tam lamah pahnihna niin, cheng nuai 52 an lakluh tawh thu a sawi a. Lersia Play hi kum 2021 a siam niin, software engineer (developer) ten a changtlun na atan chhum lo chat lo in an la buai pui char char tih a sawi bawk.
He App enkawl nan hian thla tin sum tam tak sen a ngai thin a, movie hit zual deuh a awm chang hian en tu an tam zual hle thin a, en tu an tam pauh leh vil uluk a ngaih thin avangin he App enkawlna atan hian thla khat a cheng nuai 200 an sen chang a awm bawk thin a ni. Tun ah hian App thar hlak siam tumin hma an la chho mek zel a, an release thuai an beisei.
Lersia Play in a tum ber chu mizo film induatry tih hmasawn a nih thu sawiin, film engemawzat an Co-produce tawh tih an sawi a. Filmmaker ten film an siamna tur capital investment an pek chhuah hi nuai 40 chuang a nih thu leh an film record a ti leak out thin tu mi engemawzat legal notice an pek chhuah tawh thu an sawi a, theihtawp chhuah a hma an lak zel tur thu an sawi bawk.
Mizo ten movie tha tak tak kan neih zel theih nan an movie siam ti leak out thin tute do pui a, an movie siam te lei sak zel turin mipuite an sawm a ni.
Lersia Play atangin Vbch 4.78 lalut tawh
