Rev Dr Ramengliana
Kum tinin June thla hi LGBT Pride Month angin mi tam takin an hmang a. An tilar sawt viau lehnghal a. Hemi thlaah hian Neih Inang Inkawpte chungchang an rawn uar thar sauh thin. He thil hian min chim san zel avangin Mizo Kristian taka rilru fel tak kan neih a pawimawh ta hle a ni. Mipat-hmeichhiatna (sex) thila mahni anpui kawp hi Bible zirtirna chuan a khap chiang hle tih chu Genesis 19:1-13; Leviticus 18:22; 20:13; Rom 1:18-32; I Korinth 6:9,10 & I Timothea 1:8-11 –ah te kan hmu a. Thuthlung Hlui leh Thuthlung Tharin a sawi ve ve thil a ni lehnghal. Inhawng zau thei zawnga Bible han hrilhfiah ngial te pawh an awm a, mahse hetiang hrilhfiahnate hi pawm dawn chuan pawm luih fe ngai zawk niin a lang. Pathianin a tir atanga a ruat ang takin mipat-hmeichhiatna(sex) chu nupa kar chauha hman tur a ni a, chu inneihna chu mipa leh hmeichhe inkarah a ni ngei bawk tur a ni. Hetiang thil, puan hnuai thil anga an lo ngaih liam mai mai thin, hian tunlai khawvela hmun lian tak a chang tawh a ni. Tawngkam pawh an chher thar nasa narawh e.
LGBTQIAA chu eng nge?
A hmasain kan thupui tawngkam LGBTQ hi sawifiah han tum hmasa phawt ila a tha awm e:
1. L = Lesbian → Mahni hmeichhiatpuite tisa taka itna nei.
2. G=Gay → Mahni mipatpuite tisa taka itna nei.
3. B= Bisexual → Mipa emaw hmeichhia emaw tisa taka itna nei thei ve ve.
4. T = Transgender → Doctor-te thiamna hmanga mipa hmeichhiaa inlet emaw, hmeichhia mipaa inlet
emaw.
5. Q =Queer/Questioning → Mipa nihna leh hmeichhe nihna felfai taka awm sa pawm lem lo.
6. I = Intersexed → Pianphunga mipa serh leh hmeichhe serh nei kawp. Hetiang mi hi an vang hle awm e, mahse sawi tur ting chuan an awm an ti.
7. A = Asexual → Mipat-hmeichhiatna (sex) –in a tihbuai loh, tisa chakna nei lo.
8. A = Ally → Mi pangngai ni mahse LGBT-te tan tlattu leh an tana thawk thinte.
A huam zau zawngin a chunga mite sawina tawngkam chu ‘Homosexual’ tih a ni mai a, Zotawnga an lo sawi dan ‘Mawngkawhur’ han ti bawl mai hi a mawi lo deuh a, tun hnu deuhva an chher ‘Pherh’ tih hi a zia awm deuh va, thenkhat chuan ‘Neih Inang’ te pawh an ti, mahse tawngkam kan la chher fuh tawk lo niin ka hria. A tawngkam an hman thin te pawh hi zir tham an ni. No. 1-3 hi chu a chiang deuh mai a. No. 4 (Transgender) hi No. 1 & 2 atanga irh chhuak, mahse Bible an ziah hunlaia awm lo a nih avangin Bible-ah Transgender (sex-changed) ang ngau ngau chuan sawina a awm lo va. Mahse L emaw G emaw angin sawi ta ila a dik thovin a rinawm. Tin, Q hi chu nihna dang hranpa deuh nei an ni chuang lo va, mipa/hmeichhia anga mihring fel taka thliar duh lohtute sawina tawngkam a ni mai awm e.
Hriat atana pawimawh thenkhat
Thenkhat chuan hetiang harsatna chi hrang hrang hi Bible ziah hun laia an la hriat thiam loh avangin tunlai LGBTQAA chungchang hi Bible-in sawi kim vek lovah an ngai a, an inhawng zau thiam hle a ni. Amaherawhchu, Bible thu zawm tum tlat tan erawh chuan Homosexuality hi chu pawmzam theih a ni ngang lo va. Chuti a nih reng lai chuan vawiina hetiang mite kan en dan, kan sawngbawl dan leh an chunga ro kan rel dan zawng zawng hi a dik vek chu a ni hauh lo vang. Bible atanga thlir thovin kan inenfiah a tul dawn a ni. Mihring nihna pumpui khawih thil, khawvel kalphungin a pawm zam mek leh ram dan inhawn zau telh telhna thil a nih avangin fimkhur taka kan kalpui a ngai zual a. Hengte hi hria ila:
1. LGBT te hi mi sual danglam bik an ni lo tih hriat hmasak a tha. Mi duham, rukru, zu ruih ching, nula ngaih ching, uire ching, adt., ang thova mi sual an ni ve mai. Ngaih mak bik lutuk tur pawh an ni lem lo.
2. LGBT te hi mi hurherh, zak thei lo, leh kawp theih apiang kawp duh mai an ni vek lem lo. Thenkhat phei chu nunphung pangngai a nung, zahawm taka awm, thinlung taka mahni anpui te lo ngaizawng veng veng an ni thei.
3. Mizote hian hetiang mite hi bawlzan leh nuihsawh kan ching khawp mai. Chutianga tih tur chu an ni vek bik lo tih hriat a tha. Anmahni hi zah thiam ila an dik lohna lai pawh kan hriattir tha thei zawk ngei ang.
4. Nu leh pa thenkhat chuan an fate hetiang lama chak lohna neite hi tharuma tihsim an tum thin a ni awm e. Fimkhur a ngai takzet. Hetiang tuar avanga hel zual ta sauhte pawh awm theih a ni.
5. Mahni anpuite ngaihzawnna rilru (homosexual inclination) neih leh tisa taka sex chenpuina nun (homosexual practice) hi thil dang daih a ni tih hria ila. Tuai/patil rilru neih leh a taka inhmanna hi ngaihpawlh chi a ni lo. Anpuite itna lo awm palh pawh ni se, a tak a thlen lem loh chuan a him tih hriat a tha. Nula/tlangval ngaih chakna ringawt hi chu, hlen tura beih a ni si loh chuan, sual pawi takah kan ngaih lem loh hi.
6. Kan pulpit sermon leh thusawi kawngah te kan fimkhur a tha. LGBT deu lutuk, nuihsawh leh sawt chiam chiama ramtan hi a sawt vak lem lovin a hriat thin. Kan thu ngaithlatute zingah harsa ti taka he sualna lo buan ve char charte pawh an awm thei a. Thiam taka sawi kan zir tur a ni ang.
7. Mihring an nih angin khawtlang nunah LGBT te hian dikna chanvo an nei ve tho va. Chutiangte chu an chan zel theihna turin tanpui pawh an ngai thei ang. Hetianga tih hian an thiltih leh nunphung kan pawm ta e tihna a ni lem lo ang a, Kristian hmangaihna an dawng a ni chauh zawk dawn a ni.
8. Mipa hmeichhiaa insiam leh hmeichhia mipaa insiam (transgender) te kan zingah an la awm lovang tih sawi theih a ni lo va. Hetiang thil hi Kohhran chuan phal loh tawp tur a nih laiin a lo ti tawh laklawhte inchhirin simna nun nen lo let leh ta se a dawnsawn dan tur Kohhranin a ngaihtuah fe a ngaih hmel. Inthlak let leh lah a harsat hmel tawh si a!
9. |henkhat chuan Homosexuality hi a sim theih lovah an ngai a. Amaherawhchu, Pathian thiltihtheihna hmangin a hneh theih a ni tih vawn reng a tul. Thil awlsam tak erawh a ni lo mai thei.
Bible-in an harsatna a sut kian dan
Sual dang ang thovin hetiang mite tana beiseina awm chu ngaihdam nihna tura Krista rin, Krista felna belsak leh danglam tawh tura thiltihtheihna neih a ni. ‘Inngaih hmang te, milem betute, uirete, mi hurte, mawngkawhurte, ruk hmangte, miduhamte, zu ruih hmangte, mi hau hmangte, hleprute’ te chungchang a sawi hnuah (I Kor 6:9,10) Tirhkoh Paula chuan, “nangni thenkhat chutiang mi in nih thin kha,” a ti a, chumi hnuah “nimahsela Lalpa Isua Krista hmingah leh kan Pathian Thlarauvah tlenfai in ni tawh a, tihthianghlim in ni tawh a, thiam chang in ni tawh,” tiin a chhunzawm a ni (I Kor 6:11).
Hei hian Korinth Kristiante zinga mi thenkhat chu tunhmain LGBT huam chhungah an lo awm tawh a, mahse simin an nun hmasa an kal san a, Thlarau Thianghlim tanpuinain thianghlim takin kawppui nei lo nun emaw, mahni anpui ni lo ngei neiin emaw hun an hmang tawh tih a hriat a. Isuaah chuan damna a awm tih a chiang hle a ni. Anmahni hmangaiha rawngbawlsak turin a Kohhran a dah bawk a. Chanchin |haah mi sual zawng zawng tana beiseina eng a awm ang tho hian LGBT te tan Krista Chanchin |ha chuan sual ngaihdamna leh nun thar duhawm tak neih theihna chu a awm reng a ni. Hetiang mite hi Isua Krista felna leh hmangaihnaa dawr hi kan zir theuh tur a ni awm tak a ni.