Political veteran Joseph Boakai chu Liberia presidential election neihah a chak a, president ni lai George Weah chu a hneh tiin national Electorial Commission (NEC) chuan a puang.
Boakai hian vote 50.64% hmu in international football star hlui Weah hian 49.36% vote a hmu thung tiin Davidetta Browne Lansanah, president of the commission chuan a sawi a. Boakai chakna hi vote 20,567 a ni.
Weah hian NEC in a puan chian hma pawhin a chak loh thu a lo pawm tawh a, polling station 99.98% chhiar a nih hnuah a chak dawn lo tih a hre lawk tawh a ni.
George Weah an dam dapa inthlana a chak loh a pawm chu khawvel ram hrang hrang ten an fak hle a, a chhan ber pawh tun hnaiah inthlana chak loh pawm lohna avanga tharum thawhna nasa tak a chhuah fo vang a ni.
“Liberians te chuan ECOWAS region ah democracy nun zia an pholang nawn leh a, remna hnuaiah inthlakthlengna a awm thei tih pholanin a awm leh a ni,” tiin Economic Community of West African States te chuan thuchhuah siamin an tarlang bawk.
Kum 2020 atang khan ECOWAS huam chhungah sipai tena thuneihna an lakna ram sawmpanga zingah pali lai – Mali, Guinea, Burkina Faso leh Niger ah te a awm a ni.
Kum ruk kaltaa African footballer zinga FIFA World Palyer of the Year Trophy leh Ballon d’Or dawng thei hmasa ber Liberia president atana Weah thlan a nih khan civil war hlimchhawn leh Ebola epidemic avanga an buai lai a nih vangin beiseina sang tak an nei a ni.
Mahse sawiseltute chuan Weah sorkar chu eirukna laka fihlim lo leh miretheite chhawmdawlna kawnga chak lo an ti.
Weah chuan radio kaltlangin a party chu an chak loh thu sawiin mahse “Liberia-in chakna a chang a ni,” tiin a sawi a.
Weah chuan president thlan thar chu a biaka lawmpuina a hrilh tawh thu leh an party mi leh sate pawh inthlana chak loh chu pawm turin a ngen bawk a.
West African bloc te chuan post-election chu a pawimawh em em thu sawiin Liberia mipuite chu remna leh muanna kengkawh hram hram turin an ngen bawk a ni.
Liberian ten Weah hnawl
