Library sak thara dah tur
lehkhabu thawnchhuak
Khaw hrang hranga library sakna atana hmalakna ‘Establishment of New Library in Mizoram Project’ hnuaiah library-a dah tur lehkhabu leikhawmsa chu Thawhlehni khan Rural Development & Administration minister Prof Lalnilawma’n a vailiam.
He project hi Special Assistance to States for Capital Investment (SASCI) Part-VII hnuaia thingtlang khuate tihhmasawnna tura hmalakna pakhat a ni tih minister hian a sawi a. Chief minister hmalakna azarah Ministry of Finance atanga hmuh niin, Mizoram hmun 273-a library sak tura ruahman a ni a, a buaipuitu department atan Rural Development & Administration department ruat a ni tih a sawi. Thalai leh naupang zawkten finna leh thiamna an chharchhuah theihna tura hmalakna a ni tih a sawi bawk.
Establishment of New Library in Mizoram Project-ah hian library building 229 sak thar a ni a, building awmsa 44 thawmthat an ni tawh. Bungraw hrang hrang – bookshelves, lehkhabu chhiarna tur dawhkam, thuthleng, computer set (UPS telin), librarian desk, 3-in-1 printer, LED TV with two way communication, internet connection, 3kVA power back-up with battery stand, low height rack for children dah tum a ni. Lehkhabute hi National Book Trust (NBT) leh open market atangtea lei tur niin, a vaiin 281190 lei tum a ni a. Library pakhat zelin NBT atanga lei lehkhabu 1030 leh open market atanga lei 358 theuh an dawng dawn a ni.
A thawhkhatna atan, tun tuma vailiam tak lehkhabu hi Mizoram khaw hrang hrang 69-ah semdarh phawt a ni ang.
Library sak thara dah tur lehkhabu thawnchhuak
