Link road dilna 3000 chuang awm
Mizoram hmun hrang hrang atangin loneituten link road laihsak tura sawrkara dilna thehluh 3000 chuang a awm mek tih Agriculture minister PC Vanlalruata chuan a sawi.
FOCUS Project hnuaia Mualkawi -Tuirini Rehabilitation Link Road chu Agriculture minister hian Zirtawpni khan a hawng a. FOCUS-in a bial chhunga link road tha tak, nul leh huan siam chhungkaw 100 dawnin an chhawr tur an sial zo chu lawmawm a tih thu a sawi a. Hna tha taka thawktu Vinco Construction chungah lawmthu a sawi.
Mizoram district hrang hrang a kalnaah kuthnathawktuten an mamawh an thlen tam ber chu link road hi a ni, tiin, “Tunah hian link road sialsak tura dilna hi 3000 vel a lut tawh,” a ti. Mualkawi – Tuirini Link Road chu a chhawrtu turten tangkai thei ang bera an chhawr theihnan leh kuthnathawk chhungkuate hnena malsawmna nasa tak a thlen theihnan duhsakna a hlan tih a sawi a ni.
Report-a a lan danin, he link road kawng thui zawng hi km.4.6 a ni a, link road awmsaa rigid pavement (GSB & concrete) siam a ni. Kawng zau zawng hi feet 8 leh inches 2.4 niin, inches 5-a chhah GSB leh inches 4-a chhah concrete phah a ni. Link road siamnan atan hian Rs. 3,33,45,528 sen a ni a. RS Construction kaihhruaina hnuaiah Vinco Construction-in kawng phah hna hi a thawk a ni.
Link road dilna 3000 chuang awm
