Lirthei chesualah 2 thi
Ni hnih chhunga lirtheia chetsualnaah mi pahnih an thi a, chuanpui an nei lo ve ve thung.
Inrinni chawhnu dar 1.00 vel khan Sairang Buichali lei bulah Bolero MZ01 L – 3894 chu chesualin a tlanliam a, a thlang Tlawng luiah a tla lut a ni. He lirthei khalhtu C Lalremsiama (60) h/o Laldingliani, Luangmual Aizawl chu a hmunah a thi a, an huana kal tur niin, chuanpui midang a neilo nia sawi a ni.
A ruang hi hmuh nghal a ni mai loa, Sairang Dinthar tuithiamten an zawn hnu ah tlai dar 5.00 velah hmuh a ni.
C Lalremsiama hi Horticulture department-a joint director, a hnaa tui leh inpe, midang dawnsawn thiam tak a nih avanga hriat hlawh a nih avangin ui tu a ngah hle tih thu dawn a ni.
April 7 zing dar 1.00 vel khan Lalrinmuana (22) s/o Johana, Kolasib Vengthar chu a bike khalha chesualin a hmunah a thi. Thudawn danin Lalrinmuana hi Aizawl atangin Kolasib panin ama bike in a tlan a, Bualpui Tuikhawhthla bulah truck dinglai hnung a su a ni.
Lirthei chesualah 2 thi
