Transport department-in a chhinchhiah dan chuan, tun dinhmunah hian Mizoramah lirthei 4,13,242 a awm mek a. Mihring tam lam atanga chhutin mi pathum zelin lirthei pakhat intawm ang kan ni. (Hei hi census 2021 awm lo mah se, mithiamten mihring pun chak dan rate behchhana an tin zawn/chhut chhin (projection) ang chuan, tunah hian Mizoramah mihring nuai 12 chuang hret awm tawh ang kan ni).
Lirtheite hi chi hrang hrang, mihring zin veivahna atan bika kan hman heng bus, car hrang hrang, pikup, 207, 407 leh 3wheeler leh 2Wheeler bakah, bungraw phur chi size chi hrang hrang, truck ke 12 nei chi te, JCB/Excavator sei pui puite nen vek chawhrualin lirthei pakhat sei zawng hi a tlem thei ang bera chhutin metre li (4) angin ngai ta ila. Tuna Mizoram lirthei zawng zawng sei zawng belhkhawm hi Km 1652.96 (metres 16,52,968) vel tihna a ni.
Economics & Statistics Deptt report thar ber ‘Statistical Abstract of Mizoram 2023’ ah chuan Mizoram chhunga kawngpui (national highway, state highway, district road leh town road) zawng zawng sei zawng belhkhawm chu Km 6,554.63 a ni a.
Mizoram kawngpuiah hian lirthei zawng zawng hi insi thapin hung tlar ta ila, kan kawngpui hmun thuma thena hmun khat thuak chu lirthei hian a awh thei dawn tihna a ni.
Lirthei pun chak dan han en hian, tun dinhmunah Mizoramah ni tin lirthei thar 70-80 vel awm reng ang a ni a, (kumin May thla khan ni khatah lirthei 84.6 registered a ni) chutih laiin kawngpui erawh a sei belh chak lo hle tih pawh kan hre vek awm e.
Hetiang renga lirthei a pun chak a, kawngpui kan neih belh chak si loh chuan, tun atanga kum rei loteah hian kan kawngpui zawng zawng luah khat vek thei khawpin lirthei hi a tam tawh dawn tihna a ni.
Khawvel ram ropui, hausa leh changkang ber USA-ah meuh pawh khuan, a ram pum huapin mi pakhatin car pakhat an la nei zo lo a, (state 11 velah chuan 1:1 chu a ni tawh awm e). India-ah hian mi 27-in lirthei pakhat intawm (27:1) ang vel a ni a. Mizoram erawh 3:1 kan ni vah mai!
State economy hniam ber, state pachhe ber, leiba ngah tak, state source of income nei mang lo hian lirthei chu kan ngah hle mai a, hei hi a lawmawm lam nge ni ang a, a zahthlak lam zawk? Chhungkaw pakhatin lirthei neih theih zat bituk a tul hun hi chu a lo la thleng leh nge ngein a rinawm. Intlan chhawk pawh tunhmaa fiamthu nana hman thin kha, a takin a lo thleng der tawh mai a nih hi.
Lirthei pung chak hian thil pakhat a hailan tak chu, lirthei dahna tur garage a awm ve thei zel tho si hi a ni; belh chian dawl tak maw?!
