November 9, Ningani zan khan UEFA Europa League 2023-24 khelh chhunzawm a ni a, team lian Liverpool chu Toulouse hneh lo vin an tlawm. Liverpool an tlawm lai hian West Ham United chuan hnehna an chang a, last 16 an hnaih ve thung.
Group E hmahruaitu Liverpool hi France club Toulouse hmachhawn turin Stadium Municipal-ah an lenglut a, mikhual an nihna mualah bul an tan tha lo viau a, goal hnih chhuah hmasa zawkah an tang. Chawlhlawk hnu lamah vanneihthlak angreng takin an si phurh sut zo bawk mah se, goal an chhuah nawn leh a, an tlawm ta tho thung. Toulouse lakah tlawm mah se Reds hian hma an hruai chhunzawm tho thung.
An muala team lian Liverpool mikhualtu Toulouse hian rin phak bakin an khel tha a, an taimak rah sengin, an mikhualte che hleithei lovin an siam. EPL club lian hi an zim tawt zung zung a, hmun thawl an pe duh lo. An thawhrim rah sengin chawlhlawk dawn hnaih minute 36-naah Aron Donnum chuan hmahruai na goal a thun a, si khat faia hmahruai chungin chawlhlawk an hmang.
Chawlhlawk hnu lamah French club an khel tha chhunzawm a, goal an thun leh thuai. Minue 58-na lekah Thijs Dallinga chuan Sierro siamsak atangin an goal hnihna a thun a, Liverpool an barakhaih nawn leh. An mualah si hnih faia hma an hruai vangin Toulouse hian inrintawkna sang zawk an nei a, an phur viau bawk. Phur takin inlan bawk mah se an chesual ve ta tlat thung a, minute 74-naah Cristian Cásseres Jr chuan an lamah a ti goal a, an mikhualte si phurh a sut thensak.
Goal thun bawk mah se Liverpool in hma an sawn hlei thei lova, goal chhuah hmasa zawkah an tang zui leh. Toulouse tan hian goal an chhuah atanga minute hnih hnu lekah Frank Magri chuan an goal thumna a thun zui leh a, an hmahruaina a tizau. Hun tawp dawn hnaihah si hniha hma an hruai vangin French club hi chak ngei tura ngaih an ni hman a, hun tawp dawna Liverpool nawr let tuar lovin an chak zo lo teuh viau thung.
Team huaisen, beidawng ve mai mai ngai lo Liverpool hian an si phurh sut ngei tumin tan an khawh nasa viau a, an hlawhchham lo. Minute 89-naah Diogo Jota chuan goal thunin an si phurh a sut then a, he goal vang hian phurna thar an neih belh hluai bawk. Phur taka inlan Reds tan hian midfielder Mac Allister chuan goal thunin an si phurh a sut zo zet a. VAR rawn a nih hnuin Mac Allister goal thun hi hnawl a ni a, Liverpool hi an tlawm zui ta a ni.
Group E-a inkhel dangah table mawngphaha awm mek LASK Linz chuan an mikhual Union St.-Gilloise chu si thum fai ngawtin an sawp a, a vawi khat nan point thum an hmu. Group E-ah hian khelh li atanga point kua hmuin Liverpool in hma an hruai chhun-zawm a. Ninga zana Liverpool hnehtu Toulouse khan khelh li atanga point sarih hmuin pahnihna an luah a. Point li hmu mek Union St.-Gilloise chu pathumna niin a mawngphahah Lask Linz an awm chhunzawm.
West Ham an chak
Premier League club lian Liverpool an chak loh laiin West Ham United chu London Stadium-a an mikhual Olympiacos lakah an chak a, point thum hlu tak an hmu. Hammers tan hian midfielder ngaihven hlawh Lucas Paquetá chuan he inkhela goal awm chhun hi a thun a, a team a chakpui.
An mualah an chak hnuin West Ham hi Group A hmahruaitu an ni thar a, Freiburg nen point 9 ve ve hmu dun mek mah se London club hian a chung ber an luah. West Ham hnuaia awm mek SC Freiburg hian ningani zana an mikhual TSC Backa Topola chu si nga faiin ngawtin an sawp. Group A-ah hian West Ham leh SC Freiburg ten point kua ve ve hmuin table chung an luah dun a. Olympiakos in point li an hmu mek a, TSC Backa Topola in point khat chiah an la hmu ve thung.
West Ham an chak rual hian EPL club Brighton & Hove Albion pawhin Mimualah hnehna an chang ve bawk. Brighton hian Johan Cruijff Arena-a an khingpui Ajax Amsterdam chu Ansu Fati leh Simon Adingra te goal thun hmangin an hneh. Ninga zana hnehna an chan hmang hian khelh li atangin point sarih an hmu a, Group B-ah pahnihna an ni mek. Pahnihnaah Brighton an chhoh laiin point hnih chauh la hmu Ajax hi table mawngphahah an tlahniam ve thung.
Roma an tlawm
Season liam taa finalist, Jose Mourinho enkawl AS Roma chu season kal mekah a vawi khat nan an tlawm a, an hmahruiana an hloh zui nghal.
Roma hian Fortuna Arena mualah Slavia Prague-ah si hnih faiin an tlawm. Roma hnehtu Slavia Prague hian point 9 hmuin Group G ah hma an hruai a, point kua tho hmu mek Roma an lehpel.
Liverpool an chak lo
