Pathianni zana English Premier League khelhah team lian Liverpool in hnehna an chang zo lova, Luton Town nen 1-1 in an inhnehtawk. Liverpool si phurh sutna goal thuntu Luis Diaz chuan misualin an ruk bo mek a pa chhuah tura ngenna thuziak a tarlang. Pathianni zana inkhel dangah Nottingham Forrest chuan si hnih faiin an mikhual Aston Villa an hneh.
Palinaa awm mek Liverpool hi table hnuai lama awm mek Luton Town hmachhawn turin Kenilworth Road-ah an leng lut. Table mawngphah lakah chak chak ngei tura ngaih ni bawk mah se beisei angin an khel tha thei bik lo. Reds hian ball chang tamin, goal thun theihna hun tha nei bawk mah se an vanneih ni a ni lo. Darwin Nunez-a’n yard thum lek a hnai atanga thelh phei chu uiawm tak a ni.
Kenilworth Road-a inkhel hmuhnawm ang reng takah hun rei tak goal lut a awm theih loh hnuin hun tawp dawn hnaih minute 80-naah Tahith Chong chuan mualneitu Luton Town tan Kaboré siamsak atangin hmahruaina goal a thun nawlh a, Jurgen Klopp-a team te a barakhaih. Hun tawp dawn hnaihah goal an thun vangin Luton hian inlehthalna lian thlentirin, team lian lakah point thum an hmu teuh hle.
Table hnuia lama awm lakah mualpho thei dinhmuna an din hnuin Liverpool in goal thun ngei tumin thapui an thawh a, an khingpuite an nawr na ta hle. Hun pangngai leh hun pek belh tir lam thlenga si an phurh hnuin minute 90+5-ah Luis Diaz chuan Elliott siamsak tha tak chu goal ah chantirin, an si phurh sutna goal hlu tak a thun. Diaz goal thun hnuin hun a tawp zui a, Liverpool chuan tlawm pumpelh hramin, point khat an hmu.
Liverpool si phurh sutna goal thuntu Luis Diaz chuan goal a thun hnuin misualin an ruk bo mek a pa chhuaha tura ngenna thuziak a tarlang a. Diaz hian lainat a hlawh hle. Diaz-a pa Luis Manuel Diaz chu Colombia misual pawl pakhat kutah a awm mek a, chhanchhuah a la ni lo. A pa rukbo a nih vangin Diaz hi Liverpool tan a inlan thei lo tawh a. Luton Town an hmachhawn tum pawh hian boruak rit takin delh bawk mah se manager Jurgen Klopp-a’n a mamawh vangin team tan a inlan a, an goal neih chhun a thun ta hial a ni.
Luton Town lakah tlawm an pumpelh vangin Liverpool hian table-ah hma an sawn a, Arsenal lehpelin pathumnaah an inhlangkai a. Luton Town pawhin relegation zone chhuahsanin, 17-naah an inhlangkai ve bawk.
Pathianni zana inkhel dangah season kal meka chetha tak Aston Villa chu Nottingham Forrest lakah an tlawm a, top 4 huang luah phak an tumna an puitlin thei rih lo.
Nottingham Forrest tan hian an mualah bul an tan tha viau a, minute ngana lekah Ola Aina own-goal hmangin hmahruaina goal an thun. Minute 47-naah si nghak Martinez chetsual vangin Orel Mangala chuan an goal hnihna a thun bawk.
Liverpool an chak zo lo
