Liverpool an tlawm leh tawh

Inrinni zana English Premier League khelhah Liverpool tan chanchin lawmawm lo tak pahnih a thleng. EPL-a vawi thum tlawm zawn tawh Reds hi Brentford lakah tlawmin an talbuai chhunzawm a, an tlawm vanga an hnual em em laiin an hmelma lian ber Manchester United chak thawmin a deng zui leh zat bawk. Sum seng hnem Reds an buai thui viau tawh.
Chhanhim zawh loh Reds
Champion lai Liverpool hi EPL an hmachhawn hnuhnung vawi thumah an tlawm zawn a. An hneh loh hnuhnun ber chu an hmelma lian ber Manchester United an ni. Anfield-ah ngei United an hneh loh hnuin Champions League lamah an insiamtha a, Nilai zana an khingpui Eintracht Frankfurt chu 5-1 ngawtin an sawp. UCL-ah an chak vangin phur tharna an nei a, inringtawk zawkin an inlan zui theih phah. Chak ngei tumin Brentford mualah leng lut mah se an tlawm leh ta tho a, Reds hi hun tawp dawn hnaiha Mohmed Salah goal thun pawhin a chhanhim zo lo.
Brentford hian an mikhual Liverpool an lo ngam viau a, Dango Ouattara chuan inkhel tan atanga minute 5-na lekah hmahruaina goal a thun nghal. Hma takah goal thun bawk mah se goal dang a luh belh har viau thung. Goal a luh belh theih lawk loh hnuin Kevin Schade chuan minute 45-naah an goal hnihna a thun leh ta mai a, Liverpool laka an hmahruaina a tizau.
Si hnih an phurh hnuin Liverpool in goal thun tumin an khingpui te an nawr chiam a, Milos Kerkez chuan minute 45’+5-naah goal thunin an si phurh a sut then.
Chawlhlawk hnu lamah Brentford an khel tha chhunzawm a, minute 60-na lekah penalty an hmu. He penalty hi Igor Thiago chuan pet goal in an hmahruaina a tizau leh zual. Liverpool in tlawm pumpelh ngei tumin tan an khawh a, Brentford hi an nawr na thei hle. Goal lut a awm belh lawk loh hnuin Mohamed Salah chuan minute 89-naah goal thunin an si phurh a sut then. Salah goal thun vangin Reds hian tlawm pumpelh an beisei sang leh zual. An si phurh sut zawh ngei tum mah se hun tawp thlengin goal an thun belh thei tawh lova, Brentford chuan champion lai Liverpool chu 3-2 a hnehin an mualah point thum hlu tak an hmu.
Champion lai Liverpool hi EPL-a an match hnuhnung pali-ah an tlawm vek a, table-ah an hniam chak hle. Reds hian khelh 9 atangin point 15 an hmu a, paruknaah an awm mek. Vawi li ngawt an tlawm zawn vangin an hniam chak hle. Nipui bazarah sum seng hnema an talbuai zui ta tlat hian am tih a hlawh a, ban a nih mai loh nan manager Arne Slot pawhin hnehna chanpui thuai a mmawh ta zet tawh.
United an chak leh ta
Liverpool an hneh vanga phur thar hluai Manchester United an khel tha chhunzawm a, Old Trafford-a an mikhual Brighton & Hove Albion chu 4-2 a hnehin point thum an hmuh belh.
United hian Old Trafford-a an mikhual Brighton lakah an khel tha viau a, chawlhlawk hma leh chawlhlawk hnuah goal hnih ve ve an thun. Nipui bazar laia an lak luh Matheus Cunha chuan minute 24-naah Brentford laka hmahruaina goal a thun. Cunha goal thun atanga minute 10-na chiahah midfielder Casemiro chuan goal a thun belh zui leh a, Red Devils hian si hnih faia hmahruai chungin chawlhlawk an hmang.
Chawlhlawk hnu lamah inkhel a hmuhnawm leh zual a, goal li ngawt a luh belh. United tan hian an forward thar Bryan Mbeumo chuan minute 61-naah goal thunin an hmahrruaina a tizau. Mbeumo goal thun hnu hian Brighton tan Danny Welback chuan goal thunin an inkar a tizim. Welback goal thun hnu hian Charalambos Kostoulas chuan minute 74-naah an goal hnihna a thun belh zui leh. Goal hnih an thun zawn vangin Brighton an phur a, tlawm pumpelh tumin tan an khawh nasa hle. Goal thun ngei tuma an nawr laiin United an che fuh a, Bryan Mbeumo chuan minute 90+6-ah goal thunin an chakna a nemghet ta a ni.
Vawi thum chak zawn tawh United hian hma an sawn chak viau a, khelh 9 atanga point 16 hmuin palinaah an inhlangkai a, season kal mekah vawi khat nan top 4 huang an luah.