Liverpool leh United an inhnehtawk

Pathianni zan khan English Premier League (EPL) ah inkhel ngaihven hlawh tak a awm a. Khawvela club inhal ber pawl Liverpool leh Manchester United te Anfield-ah an inhmachhawn. Anfield-a inkhel hmuhnawm takah chak zawk an awm lova, 2-2 in an inhnehtawk. Manager thar Ruben Amorim hnuaia khel tha lo United chuan Arne Slot hnuaia khel tha tak Liverpool chak tluang lai an chelh ding.
EPL leh champions league a hmahruaitu ni mek Liverpool hi an khelh that tluan lai a ni a, inrintawkna an neih san vanglai a ni. Chutihlai chuan Anfield a lenglut Manchester United erawh chu an khelhchhiat tluan lai a ni ve thung. Heti a nih vang hian Reds hian Red Devils hi awlsam takin an hneh thei ngei tura ngaihna lian tak. A boruakah inthlau viau mah se mualchhungah erawh an inthlau lo viau thung a. 2-2 a an inhnehtawk hi a lawm zawk tur chu mualneitu Liverpool an ni.
Club inhal leh ineltawk kum hlun Liverpool leh United te hian inkhel hmuhnawm an lantir a, inkhel tan phat atangin an innawr tawn nasa hle. Mualneitu Reds in na takin an mikhual an nawr nghal a, hlauhawm siamin an mikhual United an tihlauthawng thei hle. Reds hian hun tha nei thin bawk mah se United si nghak Andre Onana an paltlang thei lo. Beisei phak baka khel tha United pawhin hlauhawm siam bawk mah se chawlhlawk hmain goal thun thei an awm lova, goal awm lovin chawlhlawk an hmang.
Chawlhlawk hmain goal lut thei lo mah se chawlhlawk hnu lamah inkhel a hmuhnawm leh zual a, goal li ngawt a lut ta thung. Second half tan tirh lamah Trent Alexander Arnold chet sual vangin United in fuh takin an nawr tlang a. Defender Lisandro Martínez chuan minute 52-naah chiang zetin a pet goal a, hmahruaina goal a thun.
Goal thun hmasa zawk an nih vangin United phur viau mah se an phur rei lo. Liverpool in an si phurh sut ngei tumin an nawr let nghal chiam a, an hlawhtling har lo. Goal an chhuah atanga minute ruk hnu lekah Gody Gakpo chuan far post-ah mawi leh fuh zetin a pet kual lut a, an si phurh sutna goal ropui a thun.
An si phurh an sut vangin Liverpool an phur viau a, goal pawh an thun belh leh thuai, United defender Matthijs de Ligt handball vanga penalty an hmuh chu Mohamed Salah chuan minute 70-naah a pet goal a, hma an hruai letna goal a thun. Salah hian EPL-ah goal 175 a thun tling ta chiah a, EPL a goal thun tam lamah pangana a ni mek. Salah hi season kal mekah a chetha viau a. EPL leh Champions League-ah Liverpool a champion pui thei a nih chuan Ballon d’Or dawng thei ngei tura ngaih a ni.
Salah goal thun vangin Liverpool phur viau mah se he goal hi United hneh nan a la tawk zo chuang lo. Team lian an khelha huaisen leh khel tha tlat thin United in na takin an nawr let a, an si phurh a sut leh thuai. Fuh taka Reds tlar hnung an thiah hnuin Amad chuan minute 80-naah goal thunin an si phurh a sut. Goal hnih ve ve an thun hnuin United an khel tha zui viau a, Liverpool an nawr buai thei hle. Hun pek belhah United hian chak theihna hun tha zet mai an nei a. Harry Maguire chuan goal thun theihna hun tha zet mai a neih chu uiawm fahranin a hlah a, hnaite atangin a pet liam deuh luah. Maguire hian pet goal ngat se Liverpool tan sut lehna hun awm tawh lo tura ngaih a ni. An hmelma lian ber lakah chak theihna hun tha nei bawk mah se United an chak zo lo ta lo a, 2-2 in an inhnehtawk ta a ni.
An mualah chak zo lo mah se Liverpool hian khelh khata khel tlem chungin point rukin hma an la hruai a, table chung ber an la luah nghet. Liverpool lakah tha chungchuang taka inlan United hian hma an sawn hret a, 14-na atangin 13-naah an inhlangkai. Liverool lakah khati khawpa an khel tha khan inrintawkna sang zawk pe in, hma lam an pan tanna rahbi pawimawh a nih theih ngei a beiseiawm hle a ni.
Liverpool leh Manchester United te ang tho hian Pathianni zana inkhel dangah Fulham leh an mikhual Ipswich Town chu 2-2 in an inhnehtawk ve bawk.
Craven Cottage-a inkhelah hian penalty atangin goal thum ngawt a lut a. Penalty atanga Raúl Jiménez goal hnih thun hmangin Fulham in tlawm an pumpelh thei hram a, an mualah point khat hlu tak an hmu. Fulham lakah an chak zo lo hi Ipswich hian an ui hle ngei ang.