Securitisation and Reconstruction of Financial Assets and Enforcement of Security Interest Act 2002 (SARFAESI Act 2002) hmangin Mizoram Rural Bank (MRB) Champhai Branch hnuaia loan la, rul tha duh lo mi 6 te ram dahkham chu Champhai district magistrate James Lalrinchhana thupek angin Ningani khan chhuhsak an ni.
District magistrate hian SARFAESI Act 2002 hnuaiah Champhai khawpui chhunga loan rul tha lo mi 6 te laka dan kengkawh turin thupek a tichhuak a. District sub-divisional magistrate Dr Manesia Khaimeichho kaihruaiin MRB hotute leh police-ten SARFAESI Act 2002 hnuaia Section 14 (14)(i) in thuneihna a pek tlawhchhanin loan lak nana dahkhamte chu loan rulh that loh (non-performing assets) avangin lilam turin an chhuhsak a ni.
SARFAESI Act 2002 hmanga loan rul tha lo ram dahkham chhuhsakte hi Champhai khawpui chhunga Dinthar Vengah leh New Champhaiah pahnih ve ve, Champhai Vengthar leh Jail Vengah pakhat ve ve a ni a. Ram chhuhsak tak 6 te hlutzawng belhkhawm hi a hniam thei ang bera chhutin Rs. 96,24,899 vel niin, loan rulh ngai la bang hi Rs. 97,76,895 a ni. Loan rulh ngai aiah hian an ram dahkham chhuhsak hi bawhzui tul angte tihfel a nih hnuah lilam tura ruahman a ni ang.
SARFAESI Act 2002 hmang hian Champhai district magistrate thupek bawhzuiin kumin April 5 khan Champhai khawpui chhunga in dinglai 5 chu loan rulh that loh avangin chhuhsak an lo ni tawh a ni.
Loan rul tha duh lo te ram dahkham bank-in chhuhsak
