LoC-ah ramri kân ruk tum firfiak pahnih kap hlum

LoC-ah ramri kân ruk tum firfiak pahnih kap hlum
Jammu & Kashmir-a Kupwara district-ah Pathianni khan venhim hna thawktuten Keran sector-a Line of Control (LoC) kâna India a ruka luh tum an nanchinnaah mi pahnih an kap hlum tih thuneituten an sawi.
Sipaiten LoC bula rinhlelhawm taka mihring che vel an hmuh an en chiannaah ramri kân ruk tumte nen hian an innang ching a. Rei vak lo an inkah hnuah mi firfiak pahnih hi kah hlum an ni.
An ruang hi Pathianni tlai thleng khan la lak chhuah loh an ni a, mi dang kalpui an nei em tih sipaite hian an bawhzui mek a ni tih thuneituten an sawi.
Venhin hna thawktu hotute chuan thlasik lo thlen dawnah ramri kân ruk tum hi kum tin an pung ziah tih an sawi a. “Vur a tlak hma deuh hian a ruka lo luh tum hi an pung ziah thin a. Thla hnih chiang hret hun a la awm a, November thleng hi hun a la inhawng mek angah a ngaih thei a, a bak thla ruk lo awm leh tur chu kawng hi a ping hmiah zel a. Tun ang huna mi an tam lai tak hian vengtute pawh an inbuatsaih nasa a, ramri kân ruk hi a harsa hle dawn a ni,” tiin BSF officer pakhatin a sawi.
Mi firfiakte hi LoC hrul, India-a Bandipora leh Kupwara sector ep, thenawm ramah an tawm fur nia an hriat thu leh thlasik na tak lo thlen hmaa India-a luh ruk theih dan an dap reng niin a sawi a. “Venhimna khauh takin kalpui reng a ni a, lo luh ruk tum an awm reng bawk a; mahse, kan inbuatsaih lawk tha a, eng ang pawh lo thleng se lo buaipui nghal turin kan inpeih a ni,” a ti.
Thuneitute chuan LoC-ah hian BSF bakah sipai an awm a, hi-tech surveillance system nena inchhawpin ramri hi ngun takina n thlithlai reng tih an sawi.
Pathianni vek khan Samba district-a International Border hrulah Pakistani drone ni ngeia hriat hmuh fuh a nih avangin BSF chuan a zawn hna an thawk zui mek bawk a. Drone hi Ramgarh sector-a Karalian khaw chung velah thlawk nia sawi niin zing dar 06.30 velah a lang a, a hnuah a bo zui ta daih niin an sawi.
BSF sipaite thawk chhuak nghalin khaw chhung leh a chhehvel an dap nghal a, drone hian ramri kânin ralthuam emaw, ruihhlo emaw a thlak a nih an ring a. Dap nasa hle mah se Pathianni tlai thleng kha chuan a hnuhma awm an la hmu rih lo thung.