Los Angeles ram kang thelh tumin theihtawp chhuah mek zel

Los Angeles ram kang thelh tumin theihtawp chhuah mek zel
United States-a kangthelhtute chuan ram kang mekin Los Angeles khawpuia veng hausa hlun leh hausa ber a kan kai lohna turin theihtawp an chhuah zui mek.
Ram acre 1,000 kan belh leh tawh, Brentwood pan mek Palisades fire-in a kan belh zel lohna turin vansang atangin thlawhna hmangin tui leh thil a kang kai tur venna (fire retardant) thlak reng a ni.
Thuneitute chuan ram kang chak tak thelha kang thelhtute an buai em em laiin mipuiin hydrant atangin tui a chhuah theih loh avanga an thinrim thu an aupuina chu an chhang ve mek bawk.
Inrinni zan khan thli a chak leh hret rin a ni a, hei hian mi 16 zet thihna thlen tawh ram kang hi a puih leh zual rin a ni.
Inrinni tlai (India-a Pathianni tuk) khan LA County coroner’s office chuan thi zinga 11 chu Eaton fire-a mi leh panga chu Palisades fire-a mi a ni tih an sawi.
Hetih lai hian National Weather Service chuan Inrinni zan atanga Pathianni thlengin Santa Ana thla a la tleh chak dawn niin an sawi lawk a, hei hian ram kang hi thelh a hautak zualin a tihman kai chak zual rin a ni.
An thenawm state pasarih, sorkar laipui, Canada leh Mexico atangin California-a ram kang puihna hrang hrang a lut mek.
“LA County chuan zan huphurhawm tak leh rilru tina tak dang a tawh leh dawn a ni,” tiin Inrinni chawhma khan Los Angeles County Supervisor Lindsey Horvath chuan a sawi.
Kang thelhtute chuan thil tichhe nasa ber, Palisades fire chu nasa leh zualin an bei a, hei hian ram acre 23,000 dawn kang tawhin 11% thelh tawh a ni.
Mandeville Canyon veng a kang kai tawh a, tunah hian khawvel huap mi lar tak tak – Arnold Schwarzenegger, Disney chief executive Bob Iger leh NBA star LeBron James te in awmna, Brentwood-a chengte chu insasang thei tura inring tura tih an ni tawh.
Inthiar chhuak tura inring tura tih zinga tlang chhipa musuem, Getty Center pawh a tel a, he museum-a artwork 1,25,000 chuang vawn that zinga Van Gogh, Rembrandt, Rubens, Monet leh Degas te lemziahte pawh a awm a, a building erawh a la chhe lo.
Ram kang lian ber dawt, Eaton fire chuan acre 14,000-a zau kang tawhin 15% thelh a ni tawh a. Kang thelhtute chuan a te deuh zawk pahnih, Kenneth leh Hurst fire-te erawh an thelh thei deuh vek tawh.
Kangmei chhuah chhan tak hi hriat a la ni lo zel a. A lian pahnihin a kan zau tawh zawng hi Manhattan let hnih chuanga zau a ni tawh.
Mi 1,53,000 chuang inthiar chhuak tura tih an ni tawh a, mi dang 1,66,000 chu tlanchhe tura inring tura tih an ni bawk.
Politics-a inbeihna atan pawh an hmang tan mek a. Zirtawpni khan Governor Gavin Newsom, Democrat mi leh sa, White House luah tumna rilru pawh nei nia sawi chuan an tuikhuah pawimawh leh fire hydrant thenkhatin tui pek chhuah tur an lo nei lo chu chhui turin tih a ni tawh tih a sawi.
Los Angeles Fire Chief Kristin Crowley pawhin tui tlakchham a ni chu a sawisel a. “Kang thelhtuten tui a awm ringin hydrant an pam a, a lo awm si lo,” a ti.
Chief Crowley-i hian an khawpui roreltuten an department budget a titlem leh an khawl inchhawpna hmun thenkhat a titawp chu a sawisel bawk a, hei vang hian kang thelhna tur 100 chuang hna thawk thei lova a awm phah niin a sawi.
Los Angeles Department of Water & Power chuan Pacific Palisades leh LA-a Westside veng tinah fire hydrant chu hman theih loh a awm lo niin a sawi ve thung a, ram kang ngaih pawimawhna avangin a vangin ‘tha taka hman theih’ niin an sawi tih CNN-in a tar lang.
Inrinni khan Thawhlehnia kangmei chhuah laia Ghana sorkar thar lak luh inkhawma a lo tel daih avanga sawisel hlawh, Los Angeles Mayor Karen Bass-i pawhin Chief Crowley nena an thu a inhmuh tawk loh thu a sawi.
“Fire chief nen hian he kangmei leh nunna chhan chauh kan rilru-ah a awm rih a, kan thu a inhmuh lohna te chu mi malin kan la sawi dun ang,” a ti thung.
Mayor hi change.org petition-ah rang taka bâng nghal tura duhin mi 70,000-in an hming an ziak tawh.
Inrawkna a thlen hlauh avangin ni tlak atanga a chhuah leh thleng curfew puan a ni.
Newsom-a chuan Inrinni khan vantlang an himna turin National Guard tirh luh tawh zat chu a letin a tipung dawn tih a sawi a, sipai hi 1,680 dah tawh an ni.
Mi thahnem tak man an ni tawh a, heng zinga thenkhat chu mi ina lut ru leh curfew bawhchhia an ni.
Los Angeles County Sheriff Robert Luna chuan ui fingte nen search & rescue team 40 an feh chhuak mek tih a sawi a. In tin an dap hnuah thi zat hi an pun a rinawm thu a sawi bawk.
Tun tum ram kang hi a na hle a, car-a wheel alloy an vuahte chu a tui vek thei hial a ni.