LPG phur India pan lawngin Strait of Hormuz patlang

LPG phur India pan lawngin Strait of Hormuz patlang
India pan tur liquefied petroleum gas (LPG) phur lawng lianin Strait of Hormuz him takin a paltlang niin Pathianni khan Indian sorkar chuan thuchhuah a siam.
Marshall Islands flag intarna lawng, MT Sarv Shakti hian LPG ton 46,313 a phur a, Inrinni khan Strait of Hormuz chu a paltlang a, lawngah hian thawktu mi 20 an chuang a, an zinga 18 hi Indian an ni a, May 13 hian Visakhapatnam a thlen beisei a ni.
Ship-tracking data-ah Pathianni tlai khan Gulf of Oman-ah lawng hi a inhung tawh niin a lang.
Asia khawthlanga buaina chhuak mek avanga thil mamawh phurhna a nghawng lai a nih avangin lawng kaltlang hi a pawimawh hle a. MT Sarv Shakti bungraw phurh hian India-ah chawhma chhung vel LPG mamawh a phuhru thei tura ngaih a ni a, phurhnaa harsatna awm karah hahdamna eng emaw zat a pe thei tura ngaih a ni.
MT Sarv Shakti hi tun hnaia US kaihhruainaa Iran nena inzawmna nei lawngte danchah vel a nih hnua Strait of Hormuz paltlang thei India nena inzawm bungraw phur lawng hmasa ber a ni a. Iranian lawng chawlhhmunte danchah hian khawvel pum huapa energy kawng pawimawh tak kaltlanga lawng kal chu nasa takin a tihtlem phah.
Lawng hi boruakalhthei phur lian tak chi a ni a, a hmain Persian Gulf leh Indian lawng chawlhna inkarah a lo thawk tawh thin a, Indian Oil Corporation-in a hman (charter) a ni.
Tuna mi bakah hian India flag intar leh Indian lawng 14 vel chu Strait of Hormuz khawthlang lamah an la tangkhang mek.
Thuneitute chuan darkar 24 kalta chhung khan Indian flag nei lawng kaihhnawih thil thleng a awm lo tih an sawi.
Ports, shipping & waterways ministry chuan external affairs ministry, Indian mission leh tuipuia thuneitute nen thawhhona tha tak neiin lawnga thawkte himna leh hnathawh dan mumal tak a awm theih nan hma a la mek zel.
Directorate General of Shipping-a control room siam a nih atangin call 8,373 leh email 17,965 chuang a buaipui tawh a. Darkar 24 kalta chhung ringawt pawh khan call 38 leh email 127 a dawng a ni.
India chuan tun thlengin Gulf biala tuipuia thawk 2,953 chuang an kir lehna tur a siamsak tawh a, heng zingah hian darkar 24 kalta chhung khan mi 31 an awm a ni.
Thuneitute chuan ram puma lawng chawlhhmun kalpui dan chu a pangngai reng tih an sawi a, engmah harsatna a awm lo tih an sawi.