Luis Diaz-a Bayern Munich hat-trick hmasaber a hmin
German Bundesliga hmahruaitu Bayern Munich chuan Pathianni zanah Luis Diaz-a goal thum thun leh penalty ve ve atanga Harry Kane-a goal hnih chhuihluh hmangin an mikhual Hoffenheim lakah 5-1 hnehna an chang leh a; Kane hian inelna hrang hrangah belhkhawmin Bayern tan season kal laiah goal 38 a thawh tling tawh.
Bavarians tana a hat-trick hmasaber a nghahchhuah hnuah Colombian left winger Diaz khan season kal laiah league goal 13 a khung tling ve ta bawk.
Allianz Arena chhunga mipui 75,000 tehreng pungkhawm hmaah England forward Kane chuan minute 20 an khel tling hlawt tihin home team goal hmahruai penalty atangin a thun a; chu mi hma minute 17-a Luis Diaz laka chesual Hoffenheim defender Kevin Akpoguma hnawhchhuah a ni kha mikhual team-in an tuar ta a ni.
Minute 45 a liam hma hretin Kane bawkin penalty atangin si hnih faia German champion hmahruaina goal a thawh leh a, hei hi chawlhlawk hmain Munich lam hian an duhtawk tawh rih mai dawn emaw tih hnu hun pek belh minute hnihna a kal mek laiin Luis Diaz chuan a goal khatna a thun a, half time-ah mualneitu team-in si thum faiin hma an hruai phawt.
Second half-ah Colombia winger Diaz hian goal hnih dang khung belh lehin, Liverpool player hlui hian Germany ramah career duhawm a chhunzawm zel.
Inrinniah Wolfsburg hnehin Bundesliga table-a pahnihna luahtu Borussia Dortmund chuan reigning German champion Bayern Munich nena an inkar pawtzim hlek mah se Bavarians hian an kawtkaia hnehna nuamsa sualchhuak chungin Dortmund nena an inthlauhna hi point rukah bawk an dahkir leh.
Luis Diaz-a Bayern Munich hat-trick hmasaber a hmin
