Luman nuai 16 nei paruk telin Maoist 16 inpe

The Aizawl Post

4 hours ago

Ranchi-a Jharkhand Police kutah luman Rs. nuai 39 nei paruk telin Maoist 16 an inpe tih Thawhlehni khan thuneitu sangin a sawi.
Inpe zingah hian Basudev Da tih leh Dilip tia an koh, Santosh Mahto-a telin CPI (Maoist)-a regional committee member a ni a, thubuai 128 zet nei niin a lu man pawh Rs nuai 15 chhiar a ni a. Officer hian inpe zingah hmeichhe panga an tel bawk tih a sawi.
Regional committee member, zonal committee member leh sub-zonal committee member pahnih leh area committee hotu pahnih an tel a. Jharkhand DGP Tadasha Mishra-a chuan ‘state police tan hlawhtlinna ropui tak’ a nih thu a sawi.
“Maoist 16 inpe zinga parukte luman belhkhawm hi Rs nuai 39 zet a ni a. Hmeichhia panga an tel a, regional committee member leh zonal committee member an tel bawk,” a ti.
“Santosh-a hi district hrang hranga police station hrang hranga thubuai 128 nei lai a ni a. March 1-a ramri hnaih police station hrang hrang – Manoharpur, Chotnagar leh Jhariakela ram ngawa IED tihpuahnaa inhnamhnawih ni ngeia hriat a ni bawk a. Kha thil thlengah khan Cobra battalion sipai pakhatin hliam a tuar a ni,” a ti.
CPI (Maoist) zonal committee member Chandan Lohra-a pawh telin ani hian thubuai 78 a nei a, a luman Rs. nuai 10 a ni bawk tih a sawi.
Sub-zonal committee member pahnih, Ujjwal tia an koh, Anil Turi leh Akela tia an koh, Sukhlal Birjiyan te pawhin luman Rs nuai 5 ve ve an nei a. Area committee member pahnih, Sonaram Honhaga tia an koh, Sudesh Honhaga leh Risiv te pawhin luman Rs nuai 2 ve ve an nei a. Zonal committee member Jagabandhu tia an koh, Santosh Manjhi a tel bawk.
Maoist inpete hian INSAS rifle paruk leh AK-47 rifle pahnih, magazine 38 leh kartut 1,562 an hlan tel tih police-in an sawi a. Mishra chuan, “Kan state-a firfiak leh dan bawhchhiaa kalte tichimih kan tum zel a ni,” a ti.
Jharkhand Police chu an state-a tharum thawhna a thlen loh nana hma an laknaah an kal zel a. Police chuan Maoist laka beihpui an thlaknaah kumin chhungin Maoist 93 an man tawh a, 45 inpein 22 an that tawh bawk tih an sawi.