Lung lakna chimah chhanchhuah hna thawk mek
Pathanamthitta district, Kerala-a lung lakna hmun chima tang thawktute chhanchhuah hna thawh chhunzawm zel a ni.
Thawhtanni khan lei a chet thar leh avangin chhanchhuah hna hi chawlhsan a ni a, Thawhlehni tuk atang khan thawh chhunzawm a n.
Konni bul, Payyanamon-a lung lakna hmun chimah hian thawktu pakhat a thi tih chian a ni tawh a, mi dangte hi an tang a, an dinhmun tak hriat a harsa rih hle.
Thawhlehni tukah khan special rescue team-a mi pali chu hruiin chhiatna thlenna hmunah hian uai thlain lung in a delh excavator leh thawktu la tang dinhmun an ngaihven.
Chhanchhuah hna thawktute hian lung tenau deuhte chu kutlawngin an thian a, excavator dinhmun hi chiang taka hriat mai theih pawh a la ni lo va, an uai chho leh rih.
District Collector Prem Krishnan-a chuan chhanchhuah hna thawktute hian excavator lak chhuah dan tur hi an ngaihtuah a, hruia thluna pawh chhuahna remchang tur an dap tih a sawi.
“Hei bakah hian tonne 30-a rit chawi thei crane chu Karunagappally atanga chah mek niin lung tlate hi hnuh sawn a ni ang. Ruahmanna dang la awmah chuan Alappuzha atangin Hitachi lian chi chah a ni ang a, lung hi lak sawn a ni ang,” a ti.
Chhanchhuah hna thawka uai thlate hian excavator cabin-ah hian mi an la awm leh awm loh an hre thei lo niin a sawi bawk.
Collector chuan lung tenau deuh tla a la awm reng a, mihring tan chet mai ngamna a nih loh avangin khawl hmanga hna thawh a ngai niin a sawi.
He chhiatna hi Thawhtanni chawhma lama thleng kha kha niin excavator-in hna a thawh laiin a chung lam lung chu a tla a. Odisha atanga inhlawha awm, Mahadev leh Ajay Rai chu chhiatna a thlen lai hian khawlah hian an awm mek a ni.
Ruang pakhat hmuh tawh a ni a, tu nge a nih erawh hriat a la ni chiah lo va. Thawktute hi chhunchawlh an hmang zo, thawk chhunzawm leh tura an bung tan chiah tihin chhiatna hi a thleng a ni.
Commander Sanjay Singh Malsuni-a kaihhruai National Disaster Response Force member 27 awmna chuan a hmun hi Thiruvalla atanga thlengin hna an thawk nghal a ni.
Lung lakna chimah chhanchhuah hna thawk mek
