Lungkawlhah sial vulh punna tur din
Serchhip district Lungkawlha din sial vulh punna tur Mithun Multiplication Centre chu Zirtawpni khan AH & Vety minister C Lalsawivunga’n a hawng.
Minister chuan ram hmasawn ni turin intodelh a pawimawh hmasa a; ei leh bar, a bikin saa kan intodelh theihna turin Mithun Multiplication Centre-ah hian department-a mithiamte leh sial vulhtu society-ten neitu nihna thinlungpua thahnemngai taka bul an tan a pawimawh tih a sawi. Hri laka ran an him theihnan FOCUS 2.0 atangin bio security fencing tih beisei a ni tih a sawi a ni.
Hmanpuitu dang adviser to CM Lalmuanpuia Punte chuan hlawhtlinna tluantling thlen turin thawktute leh sial vulh lama tuimite inpekna a pawimawh tih a sawi.
AH & Vety deputy director Dr Robert Rualthankhuma sawi danin, Mithun Multiplication Centre hi Lungkawlh Sial vulh Cooperative Society-in kum 2022-a Sesih leh Luangphul ram, Lungkawlh-a din turin North Eastern Council-a dilna an thehluh hnu ah cheng nuai 531.83 senga siam a ni a. A satu hi AIE Construction Tuikhuahtlang Aizawl a ni. He Centre-ah hian sial in, watch tower, isolation ward, bio security fencing, solar lighting system, surgical instruments, vaccine, damdawi leh tul dang dah a ni.
He project hi hlawhtling taka kalpui a nih hun chuan sial chi tha tam tak vulh pun a, hlawk leh awmze nei zawka sial vulhin, sial vulhtute sum lakluh tih pun a ni dawn tih a sawi a ni. Lungkawlh Sialvulh Farming Society-ah hian member 62 an awm mek.
Lungkawlhah sial vulh punna tur din
