Lunglei district tana observer ruat mi 6-te chuan Thawhlehni khan Lungleiah returning officers, asst. ROs, SP, Expenditure Monitoring Team, candidates leh an election agent-te a huhoin an thutkhawm pui.
Tun inthlanpui atan hian Lunglei district-ah Lunglei West leh Lunglei South bial tan Satya Naryan Rathore, IAS; Thorang leh West Tuipui bial tan Avadesh Kumar Tiwari, IAS leh, Lunglei North leh Lunglei East bial tan Amol Jagannath Yedge, IAS te chu general observer an ni a. District pum tan M. Nanjundaswami, IPS chu police observer a ni. Expenditure observer-ah KS Meena, IRS chuan Lunglei North, Lunglei East leh Lunglei West kawpin, Gaurav Awasthi, IRS chuan Lunglei South, Thorang leh West Tuipui a kawp thung.
Thutkhawm kaihruaitu, district election officer Ramdinliani chuan observer-te chu tha taka Lunglei district-a inthlan muanawm, huapzo, thinghlim leh fel a awm theih nan theihtawp chhuaha an hna an thawh avangin lawmthu a hrilh a. An district-in inthlan an hmachhawn turah an inbuatsaih dan leh hmachhawp hrang hrang sawiin, boruak munawm tak hnuaia inthlan felfai leh thianghlim a awm theih nan mawhphurhna hrang hrang chelhtuten tan an lak mek zel thu observer-te hi a hrilh.
Observer-te chuan Lunglei district-in MLA inthlan a hmachhawn tura inpuahchahna chu lungawi thlak an tih thu sawiin, mawhphurha chelhtute hnenah lawmthu an sawi a ni. Lunglei an thlen atanga an duty-naa an thil hmuh leh tawnhriat sawichhuakin, thurawn pek tur an neihte pawh an sawi a. Tu tan pawha biakpawh theih reng an nih thu sawiin, zawhna awmte an chhang a ni.
Lunglei district-a observer ten thutkhawmpui an ko
