Lunglei-in faina lamah
national award dawng
Sawrkar laipui Ministry of Housing and Urban Affairs (MoHUA) buatsaih India ram puma khawpui fai inelna, Swachh Survekshan Award 2024- 2025 chu Ningani khan New Delhi-ah sem a ni a. Lunglei chuan state award pakhat – Mizoram khawpui zinga faina kawnga hma hun eng ber lawmman, ‘Promising Swachh Shehar Award’ a dawng.
Lawmman hi UD&PA minister K Sapdanga hoin, Lunglei Municipal Council vice chairman K Lalrinawma leh executive councillor Lalhruaitluangi Sailo, UD&PA secretary Lalmalsawma Pachuau leh director Jacob Lalawmpuia ten Union minister of Housing & Urban Affairs Manohar Lal kut atangin an dawng.
Swachh Survekshan Award hi Swachh Bharat Mission-Urban hnuaia inelna niin, India rama khawpui zawng zawng chu tehfung hrang hrang hmangin an inel. Tun ami hi Swachh Survekshan Award vawi 9-na niin, khawpui len dan azirin inelna huang hrang hrang siam a ni a, award chi hrang 78 sem chhuah a ni.
Kum 2016-a Swachh Survekshan Award bul tan a nih atangin Lunglei khawpui hian award 6 a dawng tawh a. Tun tum bakah hian, kum 2019-ah ‘Best City in Innovation and Best Practices in Northeast Zone’; kum 2021-ah ‘Best City in Citizen Feedback in North East Zone (population 50 thousand – 1 lakh)’; kum 2022-ah ‘Clean City in North East Zone (population 50 thousand – 1 lakh)’; kum 2023-ah ‘Clean City in North East Zone (population 50 thousand – 1 lakh)’ leh ‘Clean City within Mizoram (population below 1 lakh)’ a lo dawng tawh a ni.
Lunglei-in faina lamahnational award dawng
