Lalhmangaiha Sailo
Holy Cross Bakery
9436360275
Inthlahrung ang reng taka ka Diary 1956 Lunglei High Sikula Pawl 10 ka zir lai thu tlem Vanglaini leh Aizawl Post a ka ziah ka thiante bakah ka mi ngaihsan mi thiam tak tak ten an lo chhiar tih ka hriatin ka lawm a. Khawnge mi tam tak tan erawh ngaihnawm a ni lo mai thei. Ka tawnhriat ka awm khawhar changa chhungte hmuh lo a, nui deuh tut tut leh kun tlawk tlawk a, ka ngaihtuah chhuah leh thin kan tarlang leh teh ang.
CHANMARI NGAWPUI THIAH A NI : Tuna Agriculture Complex atanga Falkawn in kar hi Ngawpui chhah tak niin Kalkawng (Footpath) a tlang a Agri Complex (Farm) ah hian Vai Bawngpui lian tak pakhat an vulh a, Agri Inspector Pu Pianghleia hovin an awm a, a bul velah Pu Darhmingliana, Pu Rochhunga, H/A Pu Lalnghinga Overseas leh Pu Bawngleia te an awm a, a piah mualah Pu Sangvunga Mohorir a awm bawk.
IN THAR KAN SA : Chanmari Ngawpui phei hi in hmun an sem lai a ni a, tuna Presbyterian Kohhran Biak In Pu Pianghleia te kawmthlangah sawn Assam Type In thar ngawpui thiatin kan sa a. Kan chhak kawngpui hrulah Pu Masinanga (Mata), Pu Rotlaia leh Pu Lalthangliana ZTU ten Ngawpui thiatin an sa bawk a. In thar kan han luah chu ka U Saienga leh ka nau te Lalngenga leh Sangluaia te chuan thla an lak thin avangin Ngawpui kara awm kan ni na in inleng lut chhuak kan ngah thin khawp mai.
CIVIL HOSPITAL SAK A NI : Chanmaria Civil Hospital hi PB Nikhuma contractor-in a rawn sak a ni a, a Foundation a rem tur Cubic lung thiar hian kan inhlawh ve thin, amah hi a taimain a hna hi a vil ngun bawk a, a thawk tha in a thawk chak khawp an ti. Mak ka tih deuh mai chu Hnathawk tur hian tumah chhawr duh loh a neilo a, a lo kal apiang hi an thawh awm tawk tur a siam mai thin. Bazar veng, Rahsiveng leh Serkawn thlengin Nula fel leh zei tak tak Dawrkai nula thlengin zuk ruai thin nia mawle !!! Tunlai anga Thingpui dawr te awm thliah thluah ni hek lo, chaw an fun a, a ho hian chhun chawlh ah an fak ho thin a an hlim phian zawk, heng hun atang hian ni maw a thiannu fel tak Pi Buangi pawh kha a chhar ni.
Tuk khat chu, Hospital bul a kan Lung put dahkhawmna leh Pu Lalthangliana te kawt chhak Ngawpui an thiah loh ah Ram Ar rual ka thawng darh a, han tlanbo hlat na tur awm vak hek lo. Thing hniam deuh zarah an fu tlar chu Musep in kan kap a Pathum ngawt zuk phir a mawle.!! An la te deuh na in a hlimawm khawp mai.
KA CHESUAL : Tuk khat chu Zing takah Bazar turin ka chhuak a, Inrinni tuk a ni a, Thingtlang thlai thar rawn thleng lei tum ka ni a, mi an la awm meuh lo a, in ti fuh takin ka lut a, lei mai kan tum chu, min rawn umzui, tunah Bazar tura luh phal ala ni hleinem nakin dar 7 ah a rual a lut a lei tur a sin tiin min man chu a ni der mai. Min bawr laih laih lai chuan, kan thenawm pa Pu Bawngleia lokal chuan Khaih Khaih kan thenawm Tlangval hmanni lawka lo awm a nih kha, kan dan siamte a la hre ve nang tiin min chhan ta alawm!!!
Heng hun lai hian Thlai thar (Sabji) Bazar te hi la awm hek lo, chawhmeh Thlai avang a, kan Agriculture farm ber pawh Bawngpui pakhat a awm a ni mai a, a hrat deuh tan chuan, Kawmthlang Ankhapui leh Pu Sangvunga Kawmthlang Thingthupui leh Farm sir a mi te chu kan vil chawt a, Chanmari tlak lam liam, Mautuai awmlai hun chuan a khawrhin kan liamthla reng a, heng hunlai hian Kum khatah mahni Bang daih Mautuai ei kan awm sup awm e.
Kum 70 dawn liam hnu, Lunglei ka va kal leh chu, thiante tel lovin hmanlai kan sulhnu leh chet tlatna te thlirin thian hlui F Lalenga nen kan vak kual a, Chanmari phei Civil Hospital ropui tak leh a sir tuak a Building leh Dawr lian tak tak te chu thlir khum in Hospital piah Building sir atang chuan tlak lama kan Mautuai khawrh thinna mual te chu kan thlir vawng vawng a.
Kan phei zel a Falkawn kan thleng dawn, Sikul chawlhnia thianpa Hmara nen Hospital Lungrem tur Lung pua kan in hlawh nia kan chauhzia leh kan bula lokal Pi Ziki (Nl Zami nu) in Thingpui in a min sawm ni, kan lawmzia tak te kha Fanu hmeltha leh Rualkawm thiam tak tak a nei hlawm a, khami nia an ina leng, Sawrkhar hnathawk leh College naupang ka hmuh zinga Rahsiveng veng tlangval Pu Thanhawla, Pu Sapngenga te leh Pu Liandula te mitthlaah an lang a, a sira ngawi renga lo thu Pu Darhmingliana te leh AP Tlang atangin Police ho Naga tlangval chenin, mitthlaah an lang a Lung a lengin an in leh a hmun vel te chu ka thlir ruai ruai a.
Agriculture Complex lam panin kan phei zel a, Conference Hall ah Agri Staff te leh Officer Pension ho te nen Meeting hlimawm tak kan nei a. DAO Quarter a Ruai kan theh zui te chu a nuam a, a hlimawm teh reng nen, ka tla hrang a, hmanlai hunte ngaihtuah leh mitthla chungin ka hawi kual ruai ruai a. Kan meeting hoa thusawina hun kan nei ve pawh ka subject tak te kal pelin, Leitlangpui kan Vanglai hun a helai hmun vela kan chet tlat thin dan te kan hrut zuau zuau thul. Lung a lengin a hlimawm, ngaihnawm erawh an ti phian hlawm.
Kan High Sikul Dhubi Mual a mi chu ka zuk thlir a, kan classroom a Bualhranga leh Saptawna ten an sir tlar a hmeichhe thu Biaksangi leh Hrangchawli te chhaih pah zoh zoh chungin Tuibur an in theh. Kan Class Master Pu Kiauva a lo lut, an la hmuam da hman si lo, Bang kilah an chhak ta ngawt. Pu Kiauva’n hnar tum dut dutin hming pawh lam ta lawk lo chuan “What smell, What smell” a rawn ti, a hawi kual ruai ruai a, hetiang rim hi a tha lo, chin tawh loh tur a ti a. Sim zui ta tak maw!!!
Pu C |huamluaia’n Neck tie dul deuh raih a rawn suihin Class a rawn la. PAHOMA kan zir tui em em a, chilphuan tla bawrh bawrh khawpa lecture a rawn nei te, a hnua Smart tak Neck tie suih pir mam zat a Pu RL Thanzawnan OLIVER TWIST kan zir ngaihnawm tak a khabe sawi bawih bawiha lecture a pe lai te mitthlaah lang chungin kan thlir thla vawng vawng a. Kan room dep pawl 7 ho room a tleirawl ho Lalropuii te Sangchungnungi te Thanbuangi te ho infiam bengchheng pawh in an tihbuai lo va, Class an rawn la thin tak te kha mitthla ah a lo lang a. Prof Siamkima phei chuan an hming a phuah zui a, Pahoma leh Oliver Twist a kan ti zui ta nghe nghe.
Annual Sport kan neih tuma Dubi Mual kotlang khata entu awmah item chi hrang hrang ka bei ve a, a te pawl leh mithar tuma la hmelhriat loh kha, mite rin aiin ka ti tha a, Class dangte hriat pawh ka hlawhzui ta phian nghe nghe. Lungdenah phei chuan ka final pui Denghnuna min pha lo tlawmngai chuan a hnu tlai sikul banin Police Thana kawtah kan in tawng (Deng) dun leh a, rei fe kan inden pelh zak zak hnuin ka’n deng fuh a le !! Tawng khat dawnin ka’n khum chu, a beidawng ta a ni. Serkawn leh Chanmari lam haw tur kan inthen dawn chuan “Nang zawng Lehkha i thiam thei a Officer i la ni ang, kei Officer ni ve lo mah ila ka pu tiin ka ko lo ang che” tiin ka thlah a. Vawiin thleng hian kum 80 ral kan kai fe hnu thleng hian kan la inpawh zui ta zel a ni. Hemi tuma kan zirtirtu Pu Rothanga leh Pu Lalngova te Field kotlang atanga an lo te nasatzia tak te kha Pu Rothanga phei chu Neck tie phelh phung khawpin min lo au vel zuk nia.
Khaw’nge kan hrut kil lutuk dawn Leitlangpui a chul dawn lo, vanglai ni a chul si thin tiin i’n sawi zui teh ang. Heng hun laia, Rahsiveng Tlangval Lalringan Leitlangpui a chul dawn lo Vanglai ni a chul si thin a rawn phuah hi a dikin a dik tluanchhuak zel dawn. 1956 ka Classmate 33 te zingah 12 vawiin a la dam te pawh hi kum 87 kan tling chho deuh vek tawhin a tam zawk phei chu kawppui nei tawh lovin, rual an pawl tawh meuh lo. Re-union erawh phur takin an la rawt zuk nia. Tel ngei pawh an tum. Bualhranga te nupain an in tharah Re-union ruai an buatsaih dawn a, chak lo deuh pawh nupaa phurh khawm vek tur an ti.
Leitlangpui erawh a chul dawn lo, a vul zel, nikum lawkah LMC hneh takin ZPM Party in an din a, mipui rin kai leh beisei angin hna an thawk mek, chu mai a la ni lo, 2024 Assembly inthlanah Zoram mipuiin kan beisei leh kan nghahfak kalphung thar mipui Sawrkhar ZPM-in an siam naah – Leitlangpui kan duai bik lo mi tha tak tak MLA kan thlang chhuak, chung zingah chuan Zoram tan hriat reng turin Cabinet Minister-ah Pi Rinpuii kan thawhchhuak te hi, a ropuiin Pathian malsawmna a ni. Hetiang hmeichhia, huaisen leh mahni inring tawk a, Central Vai putar mipui aiawha dawhthei leh remhria Lalpan min pe te hi a lawmawmin a chhuanawm thlawt. Leitlangpui a chul dawn lo, tih phuahtu Pu Lalringa te leh Pu C |huamluaia te khan han hre vein han tel ve se zawng an lawm ve ngei ang le!!!
Pindan chhungah mittui tla mai tur avanga mit phe ruai chunga ka ziak zo chu thla hnih chhung leka Sawrkhar thar hmalakna te leh kan Minister te viak thatzia te han tarlan zui ka tum mek laiin, kan nauvin ka pu hei chanchinbu thar tiin a rawn thehlut a, kan thlir thuak thuak a, ZPM SAWRKHAR-‘VIBRANT’ SAWRKHAR – tih thianpa S Lianhrima Hauhnar ziah kan chhiar a, lawm tak chungin ka hma chhawp chu ka tawp san ta rih a. Leitlangpui erawh a chul dawn lo, a vul zel dawn e.