Lunglei Polytechnic kalh dawn
Court-in a thu sawhsawn rih lo
Mizoram Polytechnic Lunglei chu an ram luah man pek loh vanga ram neitu in court-a a thlen angin court hian ram luah man pek hma chuan building tam zawk hi vawiin, November 12 atanga kalh turin a ti a. Sawrkar chuan court hi hun pe a, a thu sut turin a ngen.
Thudawn danin, Mizoram Polytechnic Lunglei hi luah man pek loh avangin a ram neitu nia sawi Vanlaldawngliana, Theiriat Lunglei hian kum 2022 khan court-ah a lo khing tawh a, court hian ram neitu hi luah man pe turin sawrkar/ institution a lo ti tawh a ni.
Sawrkar hian luah man a pek chuan loh bakah court sang zawk ngaihtuah turin a thlen lo bawk a. Hei vang hian ram neitu hian kumin January khan District Court Lunglei-ah thlen nawnin, civil judge-in hemi chungchang hi a ngaihtuah a; luah man pek hma chu building thenkhat kalh turin a rel ta a ni.
Court-in building kalhsak tura a tih hi – Main building, Science Block, Seminar Hall & Library, Fitting & Pumbling Workshop, Workshop, Farm House leh Store Room a ni.
Hetihlai hian Mizoram Polytechnic Lunglei din tirha lecturer principal hlui lamte chuan an thawh chhung zawng hian mimal ramah he institution hi a ding tih an lo hre ngai loa, ram hawh man thinna pawh an dawng ngai lo nia an sawi thu dawn a ni.
Building kalh sak tura tih an nih chungchangah Mizoram sawrkar bakah helai bialtu MLA leh Lunglei Municipal councillor-te chuan court hnenah hian kalh sak an lohna turin an thlen a. Court hian a thu a la sut lo nia thu dawn a ni.
Hei vang hian Thawhtanni pawh khan Polytechnic zirlaite hian building kalh sak lo tur zinga tihah an bungrua/ hmanraw pawimawh an senglut a, exam hmachhawn mai tur an ni bawk tih a sawi a ni.
Lunglei Polytechnic kalh dawn Court-in a thu sawhsawn rih lo
