Lunglei – Tlabung kawng laih
mek Lunglei bawrhsap-in en
Lunglei district bawrhsap Navneet Mann chuan Lunglei – Tlabung kawng National Highway 302 kawngpui laih zauh leh siamthat hna thawh mek chu a hmunah a enfiah a. Lunglei addl DC & CALA Rochuangkimi Khenglawt leh Lunglei settlement officer Beitlotha Nohro ten an tawiawm.
NH-302 (Lunglei- Tlabung) kawng siam mek hi NHIDCL enkawlna hnuaiah contractor BRNIPL (BRN Infrastructure Private Ltd) thawh a ni a. Bawrhsap chuan Phairuangkaia lei dawh rawp tawh lutuk chu enfiahin, siamthat ngai laite siamtha thuai turin contractor-te a hrilh a, lei dawh thar hna thawh mek a enfiah bawk.
Kawng dung hmun thenkhat, khualzin veivakten harsatna an lo tawh thinna hmun chu siamthat a nih dan a enfiah bakah kawngpui zauhna atana kawng laih tawh leh siam mek hmun thenkhata kawngsira in saten kawngpui nek zawnga an sa chu tha lo a tih thu sawiin, nakin zelah harsatna la awm thei a nih avangin thiah ngaite thiat a, hma la turin Phairuangkai VC-te a chah. Kawng huamchina ROW rinchhunga zangnadawmna la tawh, in la thiat lote enfiah nghal niin, kawng siamna atana hmanraw hman a that tawk leh that tawk loh endikna, Constructions & Project Quality Control Laboratory hmun a tlawh bawk.
Lunglei district bawrhsap chuan NH-302 Chhumkhum bypass road chu a en a. Tuichawng lei dawh chu lirthei lian tan zawh tlak leh rinrawla hman tlak a nih tak loh avangin, a helna – temporary diversion road siam chu a hmunah a enfiah bawk. Thawktute chu chak leh tha taka thawk tura chahin, thawktu leh mipuiin harsatna hrang hrang an neihte chinfel dan kawng ngaihtuah zel a nih tur thu a sawi.
Lunglei – Tlabung kawng laih mek Lunglei bawrhsap-in en
