Lunglei tui lakna tur siam
mek PHE minister-in tlawh
PHE minister Prof. Lalnilawma chuan Nilaini khan Lunglei khawpui tui lakna, Greater Lunglei Water Supply Scheme (GLWSS) hmun Pialthleng leh Tlawng lui tlawhin, Lunglei-in tui hnianghnar zawk a hmuh theihnana AMRUT 2.0 leh SASCI hnuaia GLWSS tihchangtlun hna thawh mek a enfiah.
PHED Lunglei Circle hotute leh contractor-in lo dawngsawngin, GLWSS tihchangtlunna tur ruahmanna leh hnathawh mek an lo kawhhmuh bakah an harsatna leh hmachhawp an lo thlen a ni.
GLWSS tihchangtlunna tur hian thuang hnihin hma lak a ni a. Kum 2054 (kum 30 hnu) thlenga mi 111827 chawm thei tur, Tlawng leh Pialthleng lui atanga tui lakna ruahman hi SASCI 2024- 2025 sum vaibelchhe 55.7 senga bul tan niin, civil work hi PHE-in departmental work-a thawkin, hmanrua leh khawl mamawh erawh supplier atanga lak a ni.
Hmanraw mamawh chhekkhawm tawh niin, pump house leh sedimentation tank tur laih zawh a ni tawh. Zawh hun chuan tuna tui lak mek, 3.5 MLD (million litres per day) atangin 5.5 MLD-a pungin, nitin 9 MLD pe theia beisei a ni.
GLWSS tihchangtlunnan hian AMRUT 2.0 sum vaibelchhe 4.7 hmangin fur tui tam laia tui litre maktaduai 240 khuah theihna tur Tlawng lui tui khuah (gravity dam) hna thawh mek a ni bawk.
Tui khuah hna thawhna AMRUT 2.0 fund hi central atanga sum dawn ala nih loh avangin contractor hian ama sum sengin a thawk rih a. PHE minister hian AMRUT 2.0 sum chu a chhuah thuai theih nan Mizoram sawrkar chuan central lam dawrin an nawr reng tih a sawi.
Lunglei tui lakna tur siam mek PHE minister-in tlawh
